Digər enerji təsərrüfatlarında olduğu kimi, “Sumqayıt Yüksək Gərginlikli Elektrik Şəbəkəsi”ndə də (YGEŞ) texniki göstəricilərin daha da yaxşılaşdırılması istiqamətində konkret addımlar atılır. Bu məqsədlə tərtib edilib təsdiqlənmiş cari ilin III rübü üzrə tədbirlər planı əsasən yerinə yetirilib. Belə ki, 500 kV-lik II “Abşeron”, 330 kV-lik I “Abşeron”, 110 kV-lik II “Siyəzən”, I-II “Şamaxı” EVX-lərdə, 330 kV-lik “Yaşma”, 220 kV-lik “Sənaye Qovşağı”, 110 kV-lik “Xəzri” və digər yarımstansiyalarda nəzərdə tutulmuş təmir-təftiş və sınaq işləri başa çatdırılmışdır.

Müəssisədən “Azərenerji” ASC-nin Mətbuat xidmətinə daxil olan məlumatda belə deyilir və bildirilir ki, cari ilin son üç ayı ərzində 110 kV-lik “Saz-1” və “Saz-2” yarımstansiyalarının hər birində müxtəlif gücdə olan iki transformator və onun avadanlıqlarında müxtəlif təyinatlı təmir işləri aparılmışdır. Eyni gərfinlikli “Goradil” yarımstansiyasında ümumi gücü 32,5 MVA olan 1 və 2 saylı transformatorlarda da analoji işlər həyata keçirilmişdir. Mənbə onu da bildirdi ki, sözügedən dövrdə “Şamaxı”, “Masazır”, “83 saylı” və “Sulfanol” yarımstansiyalarında da transformatorlar və onların avadanlıqları təmir edilmişdir.

Qeyd edək ki, hesabat dövründə təmir işləri müəssisənin balans mənsubiyyətinə aid olan EVX-lərdən də yan ötməmişdir. Belə ki, 220 kV-lik “Yaşma”, 110 kV-lik II, III, V “Yaşma”  HX-lərin bir neçə dayaq arası naqil və ilgək (“şleyf”) təmir edilmiş, xeyli sayda izolyator dəyişdirilmiş və ildırımötürücü trosların armaturları yoxlanılmışdır. Mənbəyə istinadən onu da qeyd edək ki,  sözügedən dövrdə 110 kV-lik I-II “SAZ”, I-II “Siyəzən”, I və V “Xırdalan”, II “Sulfanol” və digər HX-lərdə də analoji təmir işləri həyata keçirilmişdir.

Mövcud hava şəraiti ilə əlaqədar müəssisənin xidməti ərazisində yanğın təhlükəsizliyi ilə bağlı mütəmadi tədbirlər həyata keçirilir. O cümlədən, yarımstansiyaların ərazisi quru otlardan təmizlənir, yağ tutumlu avadanlıqlarda yağın səviyyəsi, girimlərdə təzyiqlərin və transformatorlarda temperaturun norma həddində saxlanması təmin edilir. EVX-lərin trassası ağac və digər yaşıl kütlələrdən, dayaqların ətraflarının quru otlardan təmizlənməsi işləri aparılır. İstismar müddətinə uyğun olaraq yanğınsöndürmə vasitələri dəyişdirilərək yenisi ilə əvəz edilmişdir. Eyni zamanda 110 kV-lik “Sitalçay” yarımstansiyasında yeni qəza yağ tutumunun tikintisinə başlanmış, 330 kV-lik  “Yaşma” və 220 kV-lik “Sənaye Qovşağı” yarımstansiyalarında avtotransformatorlarda yarımavtomatik yanğınsöndürmə qurğuları yoxlanılmışdır.