İstehlakçıların keyfiyyətli və dayanıqlı elektrik enerjisi ilə təmin olunması, eyni zamanda sayğac sxemlərinə müdaxilə hallarının qarşısının alınması istiqamətində müvafiq tədbirlər görülür.

“Azərenerji” ASC-nin Mətbuat xidmətinə “Bərdə Elektrik Şəbəkəsi”ndən (EŞ) daxil olan məlumata görə, cari ilin sentyabr ayında müəssisənin xidməti ərazisində keçirilmiş reydlər zamanı 52 istehlakçının (bunun 48-i məişət abonenti (əhali) istehlakçıları qrupuna aiddir) elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 152 min  kilovatsaatdan artıq (bunun 112,6 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 9,1 min manatdan çox istehlak dəyəri bərpa edilmişdir.

Qeyd edək ki, cari ilin 9 ayı ərzində isə müəsisənin xidməti ərazisində sözügedən qayda pozuntusuna görə 960-a yaxın (bunun 822-i məişət abonenti (əhali) istehlakçıları qrupuna aiddir) akt tərtib olunmuşdur. Aktlar üzrə müvafiq qaydada hesabat aparılaraq 6 milyon 468,7 min kilovatsaata yaxın (bunun 2 milyon 819,4 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 388,1 min manatdan artıq istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğlə yanaşı ötən ildən aktlara görə yaranmış debitor borcun da müəyyən hissəsinin ödənişi təmin edilmişdir.

Mənbə cari ilin son üç ayı ərzində müəssisənin balans mənsubiyyətinə aid olan elektrik verilişi xətlərində (EVX), transformator və ya komplekt transformator mənəqələrində (TM və KTM) həyata keçirilmiş təmir işləri barəsində də məlumat verdi. Mənbəyə istinadən qeyd edək ki, sözügedən dövrdə 10 və 0,4 KV-lik EVX-lərdə həyata keçirilən təmir işləri zamanı xətlərin ümumilikdə 10,1 kilometrə yaxın hissəsi təmir olunmuşdur. Eyni zamanda 32 dayaq dəyişdirilmiş, iki travers quraşdırılmışdır. Bütün bunlarla yanaşı xətlərin müəyyən hissəsinin qabariti bərpa olunmuş, dayaqlar düzləndirilmiş və xəttin trassası yaşıl kütlədən təmizlənmişdir. Onu da qeyd edək ki, sözügedən dövrdə 55-dən artıq TM və KTM-də müxtəlif təyinatlı təmir işləri həyata keçirilmiş, eyni zamada müxtəlif gücdə iki  transformator da təmir edilərək istehlakçıların xidmətinə verilmişdir.

Onu da qeyd etmək yerinə düşərdi ki, müəssisə üzrə cari ilin sentyabr ayında ümumilikdə 17,6 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 519 min kilovatsaata yaxın çoxdur. O cümlədən, daimi əhali istehlakçı qrupunda isə 4,2 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 125 min kilovatsaata yaxın azalmışdır. Yeri gəlmişkən, cari ilin 9 ayı ərzində isə ümumi istehlak ötən ilin müvafiq dövrü ilə müqayisədə 3,3 milyon kilovatsaatdan çox  azalaraq 175,2 milyon kilovatsaatdan artıq olmuşdur. Ödəniş isə ötən ilin eyni dövrü ilə müqayisədə mütləq bir faizə yaxın artmışdır.  O cümlədən, daimi əhali istehlakçı qrupunda isə istehlak 46,2 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 7,9 milyon kilovatsaatdan çox azalmış, ödəniş isə mütləq 3 faizdən çox artmışdır.

Sonda onu da qeyd edək ki, “Bərdə” EŞ-in xidməti ərazisində vaxtında həyata keçirilmiş hazırlıq işləri hazırkı iqlim şəraitində elektrik enerjisinin daha da keyfiyyətli və dayanıqlı ötürülməsi üçün geniş imkan yaradıb.