İstehlakçılara göstərilən  xidmətin keyfiyyətinin daha da yüksəldilməsi, texnoloji itkilərin müəyyən olunmuş həddə saxlanması məqsədilə “Sumqayıt Yüksək Gərginlikli Elektrik Şəbəkəsi”nin (YGEŞ) balans mənsubiyyətinə aid olan yarımstansiyalarda cari ilin son üç ayı ərzində də bir sıra işlər yerinə yetirilmişdir.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, bu məqsədlə 330 kV-lik “Yaşma” yarımstansiyasında 1 və 3 saylı 200 MVA avtotransformator və onların avadanlıqları təmir edilmişdir. Eyni zamanda avadanlıqların qəza yağ tutumlarının və onların boru xətləri təmir edilmişdir. Bütün bunlarla yanaşı sözügedən dövrdə 110 kV-lik I və VII “Sumqayıt”, II “Siyəzən”, II və V “Yaşma” HX-lərinin avadanlıqlarında da müxtəlif təyinatlı təmir işləri həyata keçirilmişdir. Qeyd edək ki, 220 kilovoltluq “Sənaye Qovşağı” yarımstansiyasında isə 1 saylı 200 MVA avtotransformator və avadanlıqları təmir edilmişdir. Yeri gəlmişkən, analoji təmir işləri 110 kV-lik “Sumqayıt-3”, “135 saylı”, “Sumqayıt-2” və “Kimyaçılar”  yarımstansiyalarında da həyata keçirilmişdir. Eyni zamanda bu yarımstansiyaların  digər avadanlıqlarında da müxtəlif təyinatlı təmir işləri həyata keçirilmişdir.

Mənbədən əldə etdiyimiz digər bir məlumatda o da qeyd edilir ki, dayanıqlığın daha da artırılması məqsədilə YGEŞ-in xidməti ərazisində yüksək gərginlikli elektrik verilişi xətləri üzrə də müvafiq bərpa işləri icra edilmişdir.  Belə ki, 500 kV-lik II “Abşeron” HX-nin bir neçə dayağında şleyflər təmir olunmuşdur. 330 kV-lik I “Abşeron” HX-də isə naqillər və ildırımötürücü troclar təmir edilmiş, vant troslar dartılmış, torpaqlama konturunun müqaviməti yoxlanılmışdır. Onu da qeyd etmək yerinə düşərdi ki, müvafiq təmir-bərpa işləri 110 kV-lik  “Sumqayıt” HX-lərində də  aparılmışdır. Bu tədbirlər sırasına sınıq izolyatorların dəyişdirilməsi, zədəli naqillərin təmir edilməsi, sıradan çıxmış armaturların yeniləri ilə əvəz edilməsi və boşalmış sıxacların bərkidilməsi və s. daxildir. Yeri gəlmişkən, icrası reallaşdırılan tədbirlər enerji ötürücülərində dayanıqlığın  yüksək səviyyədə təmin edilməsinə geniş imkanlar açır.

Mənbədən onu da bildirdilər ki, yanğın təhlükəsizliyi ilə əlaqədar olaraq ərazidən quru otlar təmizlənmiş, yarımstansiyaların bütün yağ tutumlu elektrik avadanlıqlarında yağın səviyyəsi yoxlanılmış və normal səviyyəyə gətirilmişdir. Eyni zamanda avtomatik yanğınsöndürmə qurğusu təftiş olunaraq saz vəziyyətə gətirilmişdir. Sonda onu da qeyd etmək yerinə düşərdi ki, payız-qış mövsümünə hazırlıqla əlaqədar cari ilin III rübü üçün nəzərdə tutulmuş bütün işlər əsasən yerinə yetirilmişdir.