“Mingəçevir REŞ”in paylayıcı şəbəkələri  sırasında, eyniadlı elektrik şəbəkəsinin (EŞ) də müsbət fəaliyyətini qeyd etmək vacibdir. Paylayıcı şəbəkənin xidmət göstərdiyi ərazilərdə son  vaxtlar texniki istismar səviyyəsinin yüksəldilməsi, istehlakçılar arasında aparılan məqsədyönlü tədbirlər, eləcə də  elektrik enerjisindən qeyri-qanuni istifadə  hallarına qarşı qətiyyətli addımların atılması müəssisənin xidməti ərazisində istehlak edilmiş elektrik enerji haqqının ödənişində ciddi irəliləyiş yaradıb.

“Mingəçevir EŞ”dən “Azərenerji” ASC-nin Mətbuat xidmətinə daxil olan məlumata görə, cari ilin son üç ayı ərzində 6 və 0,4 KV-lik EVX-lərdə həyata keçirilən təmir işləri zamanı xətlərin müəyyən hissəsi dəyişdirilmiş, qabariti bərpa olunmuş, dayaqlar düzləndirilmiş və xəttin trassası yaşıl kütlədən təmizlənmişdir. Ümumiyyətlə, sözügedən dövrdə 3 kilometrdən artıq xətt təmir edilmiş, bir km-ə yaxın kabel xətti çəkilmiş və dörd dayaq basdırılmışdır. Qeyd edək ki, sözügedən dövrdə müəssisənin balans mənsubiyyətinə aid olan 19 TM-də də müxtəlif təyinatlı təmir işləri həyata keçirilmişdir.

“Şəbəkələrin bərpası və yenidən qurulmasından başqa, elektrik enerjisinin uçotunun nizama salınması proqramına uyğun olaraq müasir ödəmə sistemi - ilkin ödənişli kartlar tətbiq edilir. Bu da öz növbəsində sayğac sxemlərinə müdaxilə hallarının qarşısının alınmasında əhəmiyyətli rol oynayır”, – deyən mənbə onu da bildirdi ki, cari ilin 9 ayı ərzində müəssisənin xidməti ərazisində keçirilmiş reydlər zamanı 180-dən çox istehlakçının (bunun 155-i məişət abonenti (əhali) istehlakçıları qrupuna aiddir) elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 3 milyon 953,3 min  kilovatsaata yaxın (bunun 3 milyon 765,1 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 237,2 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 25 faizə yaxın hissəsinin ödənişi təmin edilmişdir. Qalıq debitor borcların da ödənilməsi istiqamətində müvafiq tədbirlər görülür.

Mənbədən əldə etdiyimiz digər bir məlumata görə, cari ilin sentyabr ayında müəssisə üzrə 9,3 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövründəki istehlakla müqayisədə 464 min kilovatsaat çoxdur.  Ödəniş isə ötən ilin müvafiq dövründəki göstəricidən 5,1 faiz çoxdur. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 122 min kilovatsaata yaxın artaraq 3 milyon kilovatsaatdan çox olmuşdur. Ödənişdə mütləq artım isə 12 faizdən artıqdır. Onu da qeyd edək ki, cari ilin 9 ayı ərzində müəssisə üzrə istehlak ötən ilin müvafiq dövrü ilə müqayisədə 2,2 milyon kilovatsaata yaxın azalaraq 99,5 milyon kilovatsaatdan artıq olmuşdur. Ödənişdə isə ötən ilin müvafiq dövrü ilə müqayisədə mütləq artım qeydə alınmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 1,7 milyon  kilovatsaatdan çox azalaraq 33,6 milyon kilovatsaata yaxın olmuşdur.

Sonda onu da qeyd edək ki, müəssisənin xidməti ərazisində yanğın təhlükəsizliyi ilə bağlı mütəmadi tədbirlər həyata keçirilir. O cümlədən, TM-lərin ərazisi və EVX-lərin trassası quru otlardan təmizlənir, yağ tutumlu avadanlıqlarda yağın səviyyəsi, girimlərdə təzyiqlərin və transformatorlarda temperaturun norma həddində saxlanması təmin edilir.