«Sumqayıt Elektrik Şəbəkəsi»ndə avadanlıq­la­rın istismar səviyyəsini yüksəltmək və xətlərin dayanıqlığını təmin etmək məqsədilə cari ildə bir sıra işlər həyata keçirilib. O cümlədən, cari ilin son üç ayı ərzində 4 saylı paylayıcı məntəqə ilə 121 saylı transformator məntəqəsi (TM) arasında 10 KV-lik kabel xətti əsaslı təmir edilmiş və 1,6 kilometrə yaxın kabel quraşdırılmışdır.

Sözügedən müəssisədən “Azərenerji” ASC”-nin Mətbuat xidmətinə daxil olan məlumata görə, sözügedən dövrdə ümumilikdə müəssisənin balans mənsubiyyətinə aid olan 45 kabel xəttində müxtəlif təyinatlı təmir işləri həyata keçirilmişdir. Eyni zamanda 2,8 km-ə yaxın kabel xətti, 4,6 km-dən artıq naqil yenilənmiş və 20-dən artıq dayaq quraşdırılmışdır. Bütün bunlarla yanaşı 1350-dən artıq sayğac quraşdırılmış və 28,6 km-dən artıq SİP kabel xətti çəkilmişdir.

“Gücü 630 kVA olan tranformator 1000 kVA ilə əvəzlənmişdir”, – deyən mənbə onu da bildirdi ki, cari ilin son üç ayı ərzində müəssisənin xidməti ərazisində olan 45-dən artıq TM-də müxtəlif təyinatlı təmir işləri həyata keçirilmiş, dörd transformator isə təmir edilərək şəbəkəyə qoşulmuşdur.

Mənbəyə istinadən qeyd edək ki, cari ilin 9 ayı ərzində müəssisənin xidməti ərazisində keçirilmiş reydlər zamanı 2300-dən artıq istehlakçının (bunun 2125-dən çoxu məişət abonenti (əhali) istehlakçıları qrupuna aiddir) sayğac uçot komplektində qayda pozuntusu aşkar edilərək akt tərtib olunmuşdur. Aktlar üzrə müvafiq qaydada hesabat aparılaraq 6 milyon 875,8 min kilovatsaatdan artıq (bunun 4 milyon 934,9 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 452,6 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 61 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

O cümlədən, cari ilin sentyabr ayında aşkar edilmiş 234 qayda pozuntusuna (bunun 225-i məişət abonenti (əhali) istehlakçıları qrupuna aiddir) görə 584,3 min kilovatsaata yaxın (bunun 410,8 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 35 min manatdan artıq istehlak dəyəri bərpa edilmişdir.

Onu da qeyd etmək yerinə düşərdi ki, müəssisə üzrə cari ilin sentyabr ayında ümumilikdə 63,6 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 3 milyon kilovatsaat çoxdur. Ödəniş isə ötən ilin eyni dövründəki göstəricidən mütləq 17 faizə yaxın artmışdır. O cümlədən, daimi əhali istehlakçı qrupunda isə 11,7 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 1,6 milyon kilovatsaatdan çox artmışdır. Yeri gəlmişkən, cari ilin 9 ayı ərzində isə ümumi istehlak ötən ilin müvafiq dövrü ilə müqayisədə 11,5 milyon kilovatsaata yaxın artaraq 685,7 milyon kilovatsaatdan artıq olmuşdur. Ödəniş isə ötən ilin müvafiq dövrü ilə müqayisədə mütləq 18 faizdən çox artmışdır. O cümlədən, daimi əhali istehlakçı qrupunda isə istehlak 141,4 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 6,7 milyon kilovatsaatdan çox azalmış, ödənişdə isə mütləq artım qeydə alınmışdır.

Sonda onu da qeyd edək ki, görülmüş və davam etdirilən işlər istehlakçılara göstərilən  xidmətin keyfiyyətinin daha da yüksəldilməsinə, texnoloji itkilərin müəyyən olunmuş həddə saxlanmasına, istehlak edilmiş elektrik enerjisinin sərfinə görə ödənişlərin yüksək həddə çatdırılmasına müsbət təsir göstərir.