Texniki iqtisad göstəricilərin və istismar səviyyəsinin yüksəldilməsi, mövsümə hazırlıq məqsədilə cari ilin son üç ayı ərzində 35 kV və ondan yuxarı gərginlikli yarımstansiyalarda təmir qrafikinə uyğun olaraq güc transformatorları və avadanlıqlarında müvafiq təmir və yenidənqurma işləri həyata keçirilmiş, o cümlədən avadanlıqlar müasir tipliləri ilə əvəzlənmişdir. Hazırda bu istiqamətdə işlər davam etdirilir.

“Xaçmaz” REŞ-dən “Azərenerji” ASC-nin Mətbuat xidmətinə daxil olan məlumata görə, 110 kV-lik “Xaçmaz” yarımstansiyasında 1 saylı 25 MVA-lıq transformatorun əsaslı təmirə çıxarılması ilə əlaqədar olaraq onun yerinə texniki göstəriciləri daha yaxşı olan eyni güclü transformator quraşdırılmışdır. Eyni zamanda 2 saylı 25 MVA transformatorun 10 kV-lik bölməsində isə avadanlıqların yenilənməsi işləri aparılmışdır. Bunlarla yanaşı yarımstansiyadan çıxan 10 kV-lik “Gəncəli”, II “Şəhər”, “Telestudiya” hava elektrik verilişi xətlərinin yağ açarları müasir tipli yağ açarları ilə əvəzlənmişdir.  Nəticədə yarımstansiyanın dayanıqlığı daha da möhkəmləndirilmişdir. Qeyd edək ki, təmir işləri müəssisənin xidməti ərazisində olan 110 kV-lik “Quba”, “Xudat” yarımstansiyalarında da həyata keçirilmişdir. Bütün bunlarla yanaşı balans mənsubiyyətinə aid olan 35 kV-lik yarımstansiyalarda da müxtəlif təyinatlı təmir işləri aparılmışdır. Buna misal olaraq 35 kV-lik “Quba” yarımstansiyaında 1 və 2 saylı 5,6 MVA-lıq transformatorların əsaslı təmir olunmasını, 35 və 6 KV-lik giriş yağ açarlarının müasir tipli vakuum açarlarla əvəzlənməsini, ölçü sınaq işlərinin aparılmasını və digər avadanlıqlarda aparılan təmir işlərini göstərmək olar. Yeri gəlmişkən, sözügedən dövrdə 35 kV-lik “Nasos” yarımstansiyasında 10 MVA transformator əsaslı təmir olunmuşdur. Yarımstansiyada 2-ci transformatorun quraşdırılması məqsədilə nəzərdə tutulmuş 10 və 35 kV-lik yeni giriş vakuum aşarları quraşdırılmışdır.

Onu da qeyd etmək yerinə düşərdi ki, təmir işləri müəssisənin xidməti ərazisində olan EVX-lərdən də yan ötməmişdir. Belə ki, 330 kV-lik “Xaçmaz”, “Dərbənd”, 110 kV-lik II, V, VII “Xaçmaz”, I-II “Quba”, I-II “Qusar”, 35 kV-lik “Qonaqkənd”, “Cağar” və digər hava xətlərində aparılmış müxtəlif təyinatlı təmir işləri zamanı xətlərin 157 km-dən artıq hissəsində müvafiq işlər aparılmış və xeyli sayda izolyator yenisi ilə əvəzlənmişdir.

“Yeni yarımstansiyaların tikintisi davam etdirilir”, – deyən mənbə qarşıdakı perspektiv planları barəsində də məlumat verdi. Mənbəyə istinadən qeyd edək ki, yeni 35/10 kV-lik “Qəçreş” yarımstansiyasının tikintisi davam etdirilir. Burada hər biri 10 MVA olan iki transformator quraşdırılacaqdır. Eyni zanada  tikilməkdə olan bu yarımstansiyanı qidalandıracaq 35 kV-lik iki dövrəli “Qəçreş” HEVX-nin də tikintisi aparılır. Bundan əlavə hər birinin gücü 6,3 MVA olan iki transformatorun quraşdırılacağı 35 kV-lik “Təngə-altı” yarımstansiyasının və onu qidalandıran eynigərginlikli iki dövrəli “Təngə” HEVX-nin  tikintisi  də davam etdirilir. Mənbə onu da bildirdi ki, cari ilin sonuna kimi tikintisi sürətlə davam etdirilən bu iki yarımstansiyanın istismara verilməsi və yeni layihələndirilmiş 110/35/10 kV-lik “Nabran” yarımstansiyasında tikinti işlərinə başlanması nəzərdə tutulmuşdur.

Sonda onu da qeyd edək ki, burada da yanğın təhlükəsizliyi məsələsi daim diqqət məkəzindədir. Mövcud iqlim şəraitinə uyğun olaraq yarımstansiyaların ərazisi və açıq paylayıcı quruluşları yanğından mühafizə qaydalarına uyğun olaraq otlardan təmizlənmiş, kabel kanallarında kipləndirmə işləri aparılmışdır. Eyni zamanda güc transformatorlarında yağ sızmaları aradan qaldırılmış, xeyli sayda ilkin yanğınsöndürmə vasitələri alınaraq müəyyən edilmiş hissələrdə yerləşdirilmişdir.