Cənub bölgəsinin elektrik enerjisinə olan tələbatının ödənilməsində mühüm rol oynayan “Şirvan Regional Elektrik Şəbəkəsi”ndə (REŞ) texniki  göstəricilərin daha da dayanıqlı vəziyyətdə fəaliyyətinin təmin edilməsi, o cümlədən payız-qış mövsümünə hazırlıq məqsədilə müvafiq tədbirlər həyata keçirilir. Şəbəkədən Masallı, Lənkəran, Astara, Lerik, Yardımlı, Cəlilabad, Biləsuvar, Neftçala, Salyan, Şirvan, Hacıqabul və Qaradağ rayonunun Ələt qəsəbəsinin inzibati ərazilərində yerləşən elektrik verilişi xətlərində və yarımstansiyalarında  cari ilin  son üç ayı ərzində görülmüş təmir işləri barəsində “Azərenerji” ASC-nin Mətbuat xidmətinə daxil olan məlumata görə, adları çəkilən rayon və qəsəbələrdəki istehlakçıların davamlı elektrik enerjisi ilə təminatı kollektivin ən ümdə tapşırıqlarından biridir. Bu məqsədlə də 330 kV-lik III  “Şirvan” elektrik verilişi xəttinin (EVX) 7 kilometri əsaslı təmir edilmiş, 170-dən artıq izolyator və 40 ədəd xətt armaturu yenisi ilə əvəz edilmişdir. Eyni zamanda sözügedən dövrdə 220 kV-lik II “Şirvan” və III “Masallı” HX-lərində müxtəlif təyinatlı təmir işləri həyata keçirilmiş, o cümlədən həmin bu xətlərin ümumilikdə 6,7 kilometri təmir olunmuş, 190-dan artıq izolyator yenisi ilə əvəzlənmiş və 20-yə yaxın xətt armaturu quraşdırılmışdır.

Qeyd edək ki, analoji təmir işləri 110 kV-lik EVX-lərdə də aparılmış və burada 46 kilometrdən artıq xətt əsaslı təmir edilmiş, 800-ə yaxın izolyator və 115-dən çox xətt armaturu yenisi ilə əvəz edilmişdir.

Yeri gəlmişkən, 35 kV-lik EVX-lər üzrə isə bu göstəricilər müvafiq olaraq 29 kilometr, 230-dan artıq və 125-dən çox olmuşdur.

Mənbədən əldə etdiyimiz digər bir məlumata görə isə, təmir işləri müəssisənin balans mənsubiyyətinə aid olan yarımstansiyalardan da yan ötməmişdir. Belə ki, sözügedən dövrdə 220 kV-lik “Masallı” yarımstansiyasında 2 saylı 63 MVA avtotransformator, 110 kV-lik eleqaz açarları, 10 kV-lik yağ açarı, 110 kV-lik III “Lənkəran” və V “Masallı” HX-lərin eleqaz açarları və 2 saylı 400 kVA xüsusi sərfiyyat transformatorları təmir olunmuşdur. Eyni zamanda 110 kV-lik “Ələt” yarımstansiyasında isə 1 və 2 saylı 20 MVA transformator, şinlərarası yağ açarları, eyni gərginlikli I-IV “Ələt” HX-lərinin eleqaz açarları və digər avadanlıqlarda da müxtəlif təyinatlı təmir işləri həyata keçirilmişdir.  Bütün bunlarla yanaşı analoji təmir işləri 110 kV-lik “Cənub”, “Lənkəran”, “Salyan” və digər yarımstansiyalarda da aparılmışdır.

Onu da qeyd etmək yerinə düşərdi ki, müəssisənin balans mənsubiyyətinə aid olan 35-kV-lik “İPZ”, “759 saylı”, “Aydıngün” və digər yarımstansiyalarda isə müxtəlif güclü transformator və yağ açarları  təmir edilərək normal iş rejiminə gətirilmişdir.