İtkilərin azaldılması qarşıda duran ən mühüm vəzifələrdən biridir. Bu istiqamətdə müvafiq tədbirlər müntəzəm olaraq davam etdirilir. “Kürdəmir Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə, müəssisənin xidməti ərazisində cari ilin 8 ayı ərzində keçirilmiş reydlər zamanı 246 istehlakçının sayğac uçot komplektində qüsur aşkar edilərək 817,5 min kilovatsaatdan artıq itirilmiş elektrik enerjisinin 52,3 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 99 faizdən artıq hissəsinin ödənişi  təmin edilmişdir. O cümlədən, 2013-cü ilin avqust ayında isə 23 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış, 85,5 min kilovatsaata yaxın itirilmiş elektrik enerjisinin 5,1 min manatdan artıq istehlak dəyəri bərpa edilmişdir.

Yeri gəlmişkən, mənbədən qayda pozuntularının təsnifatı və istehlakçı qrupu barədə əldə etdiyimiz məlumata istinadən onu da bildirək ki,  elektrik enerjisindən yenə də kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir.

Mənbədən cari ilin son üç ayı ərzində müəssisənin balans mənsubiyyətinə aid olan elektrik verilişi xətlərində (EVX) və transformator məntəqələrində (TM) həyata keçirilmiş təmir işləri barəsində əldə etdiyimiz məlumatda o da qeyd edilir ki, 10, 6 və 0,4 kV-lik xətlərin 18,1 kilometrdən artıq hissəsi təmir edilmişdir. Buraya 10 kV-lik “C. Cabbarlı”, II-III “Şəhər”, “Nizami” və s, rayonun Sığırlı, Carlı, Qocalı və digər bir neçə kəndlərində 0,4 kV-lik xətlərində həyata keçirilmiş müxtəlif təyinatlı təmir işləri aiddir. Qeyd edək ki, təmir kampaniyası qrafikinə uyğun olaraq sözügedən dövrdə müəssisənin xidməti ərazisində olan TM-lərdə müxtəlif gücdə 50-ə yaxın transformator da əsaslı təmir edilərək istehlakçıların istifadəsinə verilmişdir.

Onu da qeyd edək ki, müəssisə üzrə cari ilin avqust ayında ümumilikdə 9,7 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 642 min kilovatsaat azdır. O cümlədən, daimi əhali istehlakçı qrupunda isə 3,5 milyon kilovatsaata yaxın elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 109 min kilovatsaatdan çox artmış, ödənişdə mütləq artım 2 faiz olmuşdur.

Yeri gəlmişkən, cari ilin 8 ayı ərzində isə ümumi istehlak ötən ilin müvafiq dövrü ilə müqayisədə 2,4 milyon kilovatsaatdan çox artaraq 87,1 milyon kilovatsaatdan çox olmuşdur. Ödənişdə mütləq artım isə 3 faizə yaxın olmuşdur. O cümlədən, daimi əhali istehlakçı qrupunda isə istehlak 36,7 milyon kilovatsaatdan artıq olmuşdur. Nəticədə ötən ilin müvafiq dövrü ilə müqayisədə istehlak 4,4 milyon kilovatsaata yaxın artmış, ödənişdə isə mütləq artım 9 faizə yaxın olmuşdur. Onu da qeyd etmək yerinə düşərdi ki, burada yanğın təhlükəsizliyinin təmin edilməsi haqqında nəzərdə tutulan tədbirlər həyata keçirilir. O cümlədən, yağ tutumlu avadanlıqlarda yanğın təhlükəsizliyi artıq təmin edili. EVX-lərin mühafizə zonalarının və TM-lərin ərazilərinin quru otlardan və kənar əşyalardan, transformatorların özülü və gövdəsi çirkli yağ örtüyündən təmizlənib.