“Qarşıda duran ən mühüm vəzifə, istehlakçılara göstərilən  xidmətin keyfiyyətinin daha da yüksəldilməsi, texnoloji itkilərin müəyyən olunmuş həddə saxlanılması, kommersiya itkilərinin qarşısının alınması, istehlak edilmiş elektrik enerjisinin sərfinə görə ödənişlərin 100 faizə çatdırılmasıdır”, – deyən “Saatlı Elektrik Şəbəkəsi”nin məsul işçisi elektrik enerjisindən istifadə qaydalarının pozulmasına görə keçırılmış reydlər zamanı aşkar edilmiş nöqsanlar barəsində də “Azərenerji” ASC-nin Mətbuat xidmətinə məlumat vermişdir. Cari ilin avqust ayında müəssisənin xidməti ərazisində keçirilmiş reydlər zamanı 35-dən artıq qayda pozuntusu faktı aşkar edilmişdir. Nəticədə 137,1 min kilovatsaata yaxın itirilmiş elektrik enerjisinin 8,2 min manatdan çox istehlak dəyəri bərpa edilmişdir. Mənbəyə istinadən qeyd edək ki, cari ilin 8 ayı ərzində isə burada 550-dən artıq analoji fakt qeydə alınaraq 2 milyon 319,7 min kilovatsaata yaxın itirilmiş elektrik enerjisinin 139,1 min manatdan çox istehlak dəyəri bərpa edilmişdir. Həyata keçirilmiş müvafiq tədbirlər nəticəsində həmin bu məbləğin 21 faizdən artıq hissəsi ödənilmiş və qalıq hissənin ödənilməsi üçün tədbirlər görülür.

“Müəssisəmizin balans mənsubiyyətimizə aid olan EVX-lərdə, yarımstansiyalarda, transformator məntəqələrində və ya komplekt transformator məntəqələrində yenidənqurma işləri mütəmadi davam etdirilir. Yanğın təhlükəsizliyi tədbirləri, yanğından mühafizə sistemlərində avtomatik qurğuların quraşdırılması işləri günün tələbləri səviyyəsində yerinə yetirilir. Bunlardan əlavə, baş verə biləcək qəzaların, yanğın və digər xoşagəlməz hadisələrin qarşısının əvvəlcədən alınması üçün zəruri fədbirlər durmadan həyata keçirilir”, - deyən mənbə əlavə etdi ki, cari ilin son üç ayı ərzində xidməti ərazidə olan transformator məntəqələrində həyata keçirilmiş təmir işləri zamanı müxtəlif gücdə 35 transformator təmir edilərək təkrar şəbəkəyə qoşulmuşdur. Qeyd edək ki, sözügedən dövrdə müəssisənin balans mənsubiyyətinə aid olan 10 kV-lik I-II “Şəhər”, “Nəsimikənd”, “Mircəlalkənd” və digər bir neçə hava xəttində həyata keçirilmiş müxtəlif təyinatlı təmir işləri zamanı 4,7 kilometrə yaxın naqil təmir edilmişdir. Paralel olaraq rayonun Seyidoba, Məzrəli, Azadkənd və digər bir neçə kəndlərində və Saatlı şəhəri ərazisində 0,4 kV-lik xətlərdə də təmir işləri aparılaraq 8,9 km xətt təmir olunmuşdur.  Hazırda yenidənqrma və təmir işləri davam etdirilir.

Mənbədən əldə etdiyimiz digər bir məlumata görə, cari ilin avqust ayında müəssisə üzrə 6 milyon kilovatsaata yaxın elektrik enerjisi istehlak edilmişdir. Bu da ötən ilin müvafiq dövründəki istehlakla müqayisədə 155 min kilovatsaat çoxdur.  O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 410 min kilovatsaatdan çox artaraq 4,3 milyon kilovatsaatdan artıq olmuşdur.  Onu da qeyd edək ki, cari ilin 8 ayı ərzində müəssisə üzrə istehlak ötən ilin müvafiq dövrü ilə müqayisədə 7,5 milyon kilovatsaata yaxın artaraq 60,7 milyon kilovatsaatdan artıq olmuşdur. Ödəniş isə ötən ilin müvafiq dövrü ilə müqayisədə mütləq 2 faizə yaxın artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 8,7 milyon  kilovatsaatdan çox artaraq 46,1 milyon kilovatsaatdan artıq olmuşdur.