Bütün enerji obyektlərində olduğu kimi, “Abşeron Regional Elektrik Şəbəkəsi”nin (REŞ) xidməti ərazisində yerləşən yarımstansiyalar və xətlərin də əsaslı təmirini nəzərdə tutan, payız-qış mövsümünə dair tədbirlər planı qrafikə uyğun həyata keçirilir. Avadanlıqların iş səmərəliliyinin artırılması məqsədilə bir sıra əsaslı təmir və texniki təftiş işləri aparılmış, enerjinin ötürülməsi və paylaşdırılması sistemlərinin sabit və dayanıqlı işləməsi, istismar səviyyəsinin  yüksəldilməsi istiqamətində bir sıra sistem əhəmiyyətli tədbirlər həyata keçirilmişdir. O cümlədən, 220 kV-lik “Səngəçal” yarımstansiyasında 1 saylı 125 MVA avtotransformator daha güclü - 200 MVA-lıqla əvəzlənmişdir. Eyni zamanda sözügedən yarımstansiyada 220 kV-lik tərəfdə yeni 5-ci bölmənin tikinti işləri başa çatdırılmışdır. Hazırda bu yarımstansiyada 220/110 kV-lik açıq paylayıcı quruluşda (APQ) yenidənqurma işləri davam etdirilir.

Sözügedən REŞ-dən cari ilin son üç ayı ərzində görülmüş işlər barəsində “Azərenerji” ASC-nin Mətbuat xidmətinə daxil olan məlumatda belə qeyd edilir.

Mənbənin bildirdiyinə görə, sözügedən dövrdə 220 kV-lik “Hövsan” yarımstansiyası (YS) və “8-ci km” YS-da layihə əsasında yenidənqurma işləri ilə əlaqədar 110 kV-lik eleqaz açarı, cərəyan və gərginlik transformatorlarının quraşdırılması işləri başa çatdırılmışdır. Yeri gəlmişkən, analoji işlər hazırda 110 kV-lik “Ramana” yarımstansiyasında da davam etdirilir.

Mənbəyə istinadən qeyd edək ki, hazırda 500 kilovoltluq “Abşeron” yarımstansiyasında layihə üzrə 220 kV-lik açıq tipli paylayıcı quruluşda (APQ)də yenidənqurma işləri davam etdirilir.  Bundan başqa görülən işlərə 500 kV-lik  II “Abşeron”, 330 kV-lik I, VIII “Abşeron” hava elektrik verilişi xətlərinin  avadanlıqlarının təmiri də daxildir.

Enerji obyektindən bildirilir ki, növbəti fəsillərdə enerji sistemin daha da dayanıqlı fəaliyyətinin təmin edilməsi istiqamətində hazırlıq işləri təsdiq edilmiş tədbirlər planına uyğun olaraq vaxtında icra edilir. Tədbirlər planı 220 kV-lik “Müşviq” yarımstansiyasında da uğurla davam etdirilir. Belə ki, buarada 110 kV-lik APQ-də yenidənqurma işləri, o cümlədən “Səngəçal” ES ilə Müşfiq YS-i əlaqələndirən iki yeni yuvaya 110 kV-lik kabel xəttinin çəkilməsi işləri davam etdirilir.

Onu da qeyd etmək yerinə düşərdi ki, 110 kV-lik “Puta” yarımstansiyasında eynigərginlikli APQ-nin genişləndirmə işləri aparılır. Hazırda 1 saylı 40 MVA transformatorun 63 MVA ilə əvəzlənməsi işlərinə başlanmışdır.

REŞ-dən daxil olan digər məlumtda o da bildirilir ki, balans mənsubiyyətinə daxil olan  110 kV-lik “Dübəndi” hava xəttində (HX) yenidənqurma işləri əsasən başa çatdırılmışdır. 110 kV-lik IV- V “Şimal”, I-II “Qala”, III “Maştağa”, III “Ramana”, 220 kV-lik “Ağsu”, “Qəbələ” hava elektrik veriişi xətlərində də yenidənqurma işləri davam etdirilir.

Şəbəkədən verilən məlumata istinadən, yerinə yetirilən və hazırda davam etdirilən təmir-bərpa işləri Bakı və bakıətrafı ərazinin enerji təhlükəsiziliynin yüksək səviyyədə təmin edilməsi istiqamətində atılan mühüm addımdır və bu işlər davamlı olaraq yerinə yetiriləcəkdir.