“Xaçmaz Elektrik Stan­siyası”nda istismar fəaliy­yəti dispetçer qrafikinə uy­ğun şəkildə təşkil olunub. Müəssisədən bu barədə “Azərenerji” ASC-nin Mətbuat xidmətinə mə­lumat verərkən bildirilmiş və qeyd olunmuşdur ki, cari ilin 8 ayı ərzində burada 173,7 milyon kilovat-saatdan artıq elektrik enerjisi istehsal edilib. Avqust ayında bu göstərici 15,8 milyon kilovat-saatdan çox olub.

Qeyd edək ki, stansiyada hazırda 3 saylı aqreqat təmir olunur. Bunun ardınca 2 aqreqatda turbin kompressorların təmiri planlaşdırılır. Ərazinin yanğın əleyhinə yaşıl kütlədən təmizlənməsi işləri də aparılır.

Müəssisədə əməyin mühafizəsi və texniki təhlükəsizlik qaydalarına ciddi riayət olunduğunu qeyd edən mənbə bildirdi ki, ümumiyyətlə, keyfiyyətli fəaliy­yətdən söhbət gedirsə, o halda işçi heyətin sağlamlığının mühafizəsi mühüm amil kimi diqqətdə saxlanılmalıdır. Ona görə də artıq qarşıdan gələn qış fəsli ilə əlaqədar işçilərin xüsusi geyim dəsti və ayaqqabılar, xüsusi alətlər və təhlükəsizlik lövhələri ilə təmin olunmaları üçün sifarişlər verilib.

Mənbə onu da bildirdi ki, mövcud texnikanın istismar vəziyyətini müəyyənləşdirmək üçün monitorinqin keçirilməsi də daimi xarakter daşıyır. Bu da istənilən avadanlıqda aşkarlanan qüsurun aradan qaldırılması, zəruri hallarda avadanlıqların yenisi ilə əvəzlənməsi baxımından əhəmiyyətlidir.