“Biləsuvar Elektrik Şəbəkəsi”nin kollektivi növbəti payız-qış mövsümünə ciddi hazırlıq görür. Müvafiq tədbirlər planına uyğun olaraq, görülən işlərin miqyası genişdir. Ötən son üç ay ərzində ümumi gücü 1,2 MVA-ya yaxın olan 6 ədəd 10/0,4 kilovoltluq transformator əsaslı təmir edilərək təkrar istismara verilib. 24 transformator məntəqəsində isə müxtəlif təyinatlı təmir işləri həyata keçirilmişdir.

Sözügedən müəssisədən “Azərenerji” ASC-nin Mətbuat xidmətinə daxil olan məlumatda belə qeyd edilir və bildirilir ki, 10 və 0,4 kV-lik xətlərin, ümumiyyətlə təsərrüfatın normal vəziyyətdə saxlanılmasına xüsusi diqqət yetirilir. Belə ki, hesabat dövründə 0,4 kV-lik xətlərin 6,7 km-dən artıq hissəsində, 10 kV-lik xətlərin isə 10 km-dən çox hissəsində əsaslı təmir işləri həyata keçirilmişdir.

Növbəti aylarda da bu işlər davam etdiriləcəkdir”- deyən mənbə sayğac sxeminə mudaxilə hallarının aşkarlanması ilə əlaqədar keçirilmiş reydlər və aşkar edilmiş qayda pozuntuları barəsində də məlumat verdi və bildirdi ki, cari ilin avqust ayında 36 istehlakçının elektrik enerjisindən istifadə qaydalarını pozması faktı aşkar edilərək 46,4 min kilovatsaatdan artıq itirilmiş elektrik enerjisinin 2,4 min manata yaxın istehlak dəyəri bərpa edilmişdir.  Qeyd edək ki, cari ilin 8 ayı ərzində burada 305-dən artıq qayda pozuntusu aşkar edilərək 1 milyon 757,7 min kilovatsaatdan artıq itirilmiş elektrik enerjisinin 105,5 min manata yaxın istehlak dəyəri bərpa edilmişdir. Həyata keçirilmiş müvafiq tədbirlər nəticəsində həmin bu məbləğin 48 faizə yaxın hissəsinin ödənişi təmin edilmiş və qalan hissənin ödənilməsi üçün müvafiq tədbirlər görülür.   Onu da qeyd edək ki,  qeydə alınmış qayda pozuntularında dövlət möhürlərinin zədələnməsi, elektrik enerjisindən sayğacdan kənar xətt vasitəsilə istifadə halı üstünlük təşkil etmişdir.

Müəssisə üzrə cari ilin avqust ayında ümumilikdə 8,2 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 869 min kilovatsaata yaxın azdır. Ödəniş isə ötən ilin müvafiq dövrü ilə müqayisədə mütləq 14 faiz artmışdır. O cümlədən, daimi əhali istehlakçı qrupunda isə 2,8 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 265 min kilovatsaatdan çox azalmışdır.   Yeri gəlmişkən, cari ilin 8 ayı ərzində isə ümumi istehlak ötən ilin müvafiq dövrü ilə müqayisədə 5 milyon kilovatsaatdan çox artaraq 63,6 milyon kilovatsaata yaxın olmuşdur. Ödənişdə mütləq artım isə 22 faizə yaxın olmuşdur. O cümlədən, daimi əhali istehlakçı qrupunda isə istehlak 25,8 milyon kilovatsaata yaxın olmuşdur. Nətəcədə ötən ilin müvafiq dövrü ilə müqayisədə istehlak 2 milyon kilovatsaata yaxın azalmış, ödəniş isə mütləq 4 faiz artmışdır.