İstehlakçıların elektrik enerjisinə olan tələbatını tam və keyfiyyətli şəkildə ödəmək məqsədilə “Balakən” elektrik şəbəkəsində də mühüm addımlar atılır. Bu da istehlakçılara göstərilən xidmətin keyfiyyətinin yüksəldilməsinə və müəssisənin texniki-iqtisadi göstəricilərində yüksək nəticələrə nail olunmasına gətirib çıxarır.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, əsaslı təmir qrafikinə əsasən cari ilin son üç ayı ərzində Balakən şəhəri, rayonun Sarıbulaq, Yenişərif, Hənifə və digər bir neçə kəndlərinin 10, 6 və 0,4-kV-luq  şəbəkələrin ümumilikdə 5,1 kilometrə yaxın hissəsində müxtəlif təyinatlı təmir işləri həyata keçirilmişdir.

Qeyd edək ki, şəbəkənin balans mənsubiyyətinə aid olan transformator məntəqələrinə (TM) və komplekt transformator məntəqələrinə (KTM) baxış keçirilmiş, on dörd TM-də təmir işləri aparılmışdır.

Mənbə onu da bildirdi ki, əməkdaşlar tərəfindən elektrik enerjisindən qeyri qanuni istifadə hallarının qarşısı vaxtında alınır və həmin istehlakçılar barəsində müvafiq tədbirlər görülür. Belə ki, cari ilin 8 ayı ərzində müəssisənin xidməti ərazisində keçirilmiş reydlər zamanı 235-dən çox istehlakçının sayğac uçot komplektində qüsur aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 484,6 min  kilovatsaata yaxın itirilmiş elektrik enerjisinin 29,1 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 66 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. O cümlədən, cari ilin avqust ayında aşkar edilmiş 52 qayda pozuntusuna görə 80,7 min kilovatsaata yaxın itirilmiş elektrik enerjisinin 4,8 min manatdan artıq istehlak dəyəri bərpa edilmişdir.

Mənbə onu da bildirdi ki, cari ilin avqust ayında müəssisə üzrə 3,6 milyon kilovatsaatdan artıq elektrik enerjisi istehlak edilmişdir ki, bu da ötən ilin müvafiq dövründəki istehlakla müqayisədə 190 min kilovatsaat azdır. Ödəniş isə ötən ilin müvafiq dövrü ilə müqayisədə mütləq 7 faizə yaxın artmışdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 390 min kilovatsaata yaxın azalaraq 2,1 milyon kilovatsaatdan artıq olmuşdur.

Yeri gəlmişkən, cari ilin 8 ayı ərzində müəssisə üşrə ümumi istehlak 28,2 milyon kilovatsaatdan artıq olmuşdur. Nəticədə ötən ilin müvafiq dövrü ilə müqayisədə istehlak 616 min kilovatsaatdan çox, ödəniş isə mütləq 11 faizə yaxın artmışdır.  O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 1 milyon kilovatsaatdan çox azalaraq 17,1 milyon kilovatsaatdan artıq, ödənişdə mütləq artım isə 6  faizə yaxın olmuşdur.

Sonda onu da qeyd edək ki, kadrların təkmilləşdirilməsi məsələsi də şəbəkədə diqqətdə saxlanılır.