Respublika enerji sisteminin bütün obyektlərində olduğu kimi “Astara Elektrik Stansiyası”nda da aqreqatlara nəzərdə tutulmuş bütün texniki xidmətlər qrafikə uyğun göstərilmişdir. Məhz onun nəticəsidir ki, ötən ildə olduğu kimi, cari ilin 8 ayında da elektrik enerjisi istehsalında problem yaranmamışdır. Elektrik stansiyasından  “Azərenerji” ASC-nin Mətbuat xidmətinə daxil olan məlumata görə, müəssisə cari ilin 8 ayı ərzində dispetçer qrafikinə uyğun olaraq cənub bölgəsinin fasiləsiz elektrik enerji ilə təminatında mühüm rol oynamışdır. Belə ki, sözügedən dövr ərzində 167,3 milyon kilovatsaat elektrik enerjisi istehsal edilmişdir. Qeyd edək ki, kollektiv cari ilin avqust ayında da yaxşı işləmiş və 169,8 milyon kilovatsaat elektrik enerjisi istehsal etmişlər.

“Digər enerji obyektləri kimi adıçəkilən obyektdə də iş rejimi günün tələblərinə cavab verə biləcək səviyyədədir. Hal-hazırda elektrik stansiyası dispetçer qrafikinə uyğun olaraq fəaliyyət göstərir”, – deyən mənbə onu da bildirdi ki, avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsinin və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində elektrik enerji istehsalının digər texniki göstəricilərində də yüksək nəticələr əldə edilmişdir.

Nəzərdə tutulmuş təmir-bərpa işləri barədə məlumat verən  mənbə onu da qeyd etdi ki, cari ilin son üç ayı ərzində altı aqreqatda növbəti istismar həddinə uyğun olaraq texniki qulluq işləri yerinə yetirilmişdir. Eyni zamanda 3 saylı aqreqatda əsaslı təmir işləri başa çatdırılmış və aqreqatın yaxın vaxtda işə qoşulması gözlənilir.

Mənbədən onu da bildirdilər ki, digər müəssisədə olduğu kimi, burada da yanğına qarşı təhlükəsizlik tədbirləri daima diqqət mərkəzindədir. Belə ki, müntəzəm olaraq stansiyanın və yarımstansiyanın ərazisi quru otlardan təmizlənir. Eyni zamanda ilkin yanğınsöndürmə vasitələrinə baxış keçirilmiş, aşkar edilmiş nasazlıqlar aradan qaldırılmış və digər qabaqlayıcı tədbirlər həyata keçirilmişdir.

Onu da qeyd etmək yerinə düşərdi ki, payız-qış mövsümündə stansiyanın dayanıqlı və təhlükəsiz iş rejimini saxlamaq məqsədilə tərtib edilmiş tədbirlər planına uyğun olaraq işlər qrafik üzrə davam etdirilir. Xatırladaq ki, ümumi gücü  87 MVt olan bu stansiya 10 aqreqatdan ibarətdir.