«Naftalan» elektrik şəbəkəsində (EŞ) növbəti payız-qış mövsümünə hazırlıq işləri davam etdirilir. Elektrik verilişi xətlərində və ötürücü avadanlıqlarda cari və əsaslı təmir işləri aparılır.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, cari ilin son üç ayı ərzində 10 kV-lik I “Xanqərvənd”, II “Sanatoriya” hava xətlərində həyata keçirilmiş müxtəlif təyinatlı təmir işləri zamanı xəttin bir km-ə yaxını təmir edilmiş, dayaqlar düzləndirilmiş, naqillərin qabariti bərpa olunmuş və trassası yaşıl kütlədən təmişlənmişdir. Paralel olaraq Qazaltı kəndində müəssisənin balans mənsubiyyətinə aid olan  0,4 kV-lik EVX-də də analoji təmir işləri həyata keçirilmişdir. Qeyd olunanlarla yanaşı, şəbəkənin balansında olan üç TM-də də müxtəlif təyinatlı təmir işləri həyata keçirilmişdir.

“Mütəmadi reydlərin keçirilməsinə və digər təşkilatı tədbirlərə baxmayaraq, hələ də bu və ya digər şəkildə  sayğac sxeminə mudaxilə, kənar xətt vasitəsilə elektrik enerjisindən istifadə halları var. Məqsədimiz bu pozuntu faktlarını vaxtında aşkar edərək onların qarşısını almaqdır”, – deyən mənbə “Elektrik enerjisindən istifadə qaydaları”nın pozulmasına görə keçırılmış reydlər zamanı aşkar edilmiş nöqsanlar barəsində də məlumat verdi.

Mənbədən verilən məlumata görə, cari ilin 8 ayı ərzində müəssisənin xidməti ərazisində keçirilmiş reydlər zamanı 4 istehlakçının (bunun 3-ü məişət abonenti (əhali) istehlakçıları qrupuna aiddir) elektrik enerjisindən qeyri-qanuni istifadə etdiyi aşkar edilərək 16,4 min kilovatsaatdan artıq (bunun 13,7 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 984 manatdan çox istehlak dəyəri bərpa edilmişdir. Həyata keçirilmiş məqsədyönlü tədbirlər nəticəsində həmin bu məbləğlə yanaşı ötən ildən aktlara görə yaranmış debitor borcun da müəyyən hissəsinin ödənilməsi təmin edilmişdir.

Qayda pozuntularının xarakterindən söz açan mənbə elektrik enerjisindən kənar xətt vasitəsilə istifadə edilməsi halının üstünlük təşkil etdiyini bildirdi.

Onu da qeyd etmək yerinə düşərdi ki, müəssisə üzrə cari ilin avqust ayında ümumilikdə 1,2 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 21 min kilovatsaata yaxın çoxdur. O cümlədən, daimi əhali istehlakçı qrupunda isə 279 min kilovatsaat elektrik enerjisi istehlak edilmişdir. Ötən ilin müvafiq dövrü ilə müqayisədə istehlak müəyyən qədər azalmış, ödəniş isə 3 faizə yaxın mütləq artmışdır.

Yeri gəlmişkən, cari ilin 8 ayı ərzində isə ümumi istehlak ötən ilin müvafiq dövrü ilə müqayisədə 4 min kilovatsaat  artaraq 8,7 milyon kilovatsaata yaxın olmuşdur. Ödəniş isə ötən ilin eyni dövrü ilə müqayisədə mütləq 3 faizdən çox artmışdır.  O cümlədən, daimi əhali istehlakçı qrupunda isə istehlak 2,3 milyon kilovatsaata yaxın olmuşdur. Nətəcədə ötən ilin müvafiq dövrü ilə müqayisədə istehlak 141 min kilovatsaata yaxın, ödəniş isə mütləq 8 faizdən çox artmışdır.