“Gəncə Regional Elektrik Şəbəkəsi”nin tərkibində olan Tovuz, Ağstafa, Qazax elektrik şəbəkələrində  texniki göstəricilərin yaxşılaşdırılması,  xüsusən, 10-6-0,4 kV-lik şəbəkələrdə texniki itkilərin azaldılması məqsədilə  müvafiq işlər görülüb.

Bu barədə “Azərenerji” ASC-nin Mətbuat xidmətinə daxil olan məlumatda bildirilir.  “Tovuz” elektrik şəbəkəsinin (EŞ) xidməti ərazisində  son iki ayda 6-10 kV-lik 23 dayaq dəyişdirilib. Şəbəkədə yaradılmış təmirçilər briqadası 16 TM-də əsaslı təmir aparıb.  Elektrik verilişi xətlərində də zəruri işlər görülüb. 6-10 və 0,4 kV-lik EVX-nin 3 kilometrə yaxınında əsaslı təmir aparılıb, 10-6/0,4 kV-lik 7 transformator təmir olunaraq yenidən istismara verilib.

Şəbəkədən bildirildiyinə görə, tədbirlər planına uyğun olaraq, enerji təsərrüfatında cari təmir işləri də görülüb. Belə ki, 10-6-0,4 kV-lik 23 transformator, 6-10 və 0,4 kV-lik EVX-lərin bəzi hissələrində cari təmir işləri aparılıb.

Ağstafada 6-10 kV-lik 40, həmçinin 0,4 kV-lik 8 dayaq yenisi ilə əvəz olunub. 19 TM, 15 transformator və EVX-lərdə cari təmir həyata keçirilib. Şəbəkənin balansındakı transformatorlardan biri avqust ayında  əsaslı təmir olunaraq istismara verilib.

Respublikamızın qərb qapısı sayılan Qazax rayonunun elektrik təsərrüfatında  dayanıqlılığı daha da artırmaq, abonentləri dayanıqlı və keyfiyyətli enerji ilə təmin etmək məqsədilə bir sıra məqsədyönlü tədbirlər həyata keçirilib. Belə ki, şəbəkənin xidməti ərazisində  mövcud transformatorlardan biri əsaslı, 17-si isə cari təmirdən çıxarılıb, yeni ayrıclar quraşdırılıb. İki ədəd vakuum açarı qoyulub, elektrik verilişi xətlərində cari təmir işləri aparılıb.

Enerji təchizatı müəssisələrində işlər əvvəlcədən müəyyənləşdirilmiş qrafik üzrə davam etdirilir,  mövsümün əlverişli günlərindən  səmərəli istifadə olunur.