“Goranboy Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə, müəssisənin xidməti ərazisində istehlakçıların daha da keyfiyyətli və dayanıqlı elektik enerjisi ilə təmin olunmasına xüsusi diqqət yetirilir. Bu məqsədlə elektrik avadanlıqları və hava elektrik verilişi xətləri vaxtlı-vaxtında təmir olunur, saz vəziyyətə gətirilir. Şəbə­kənin ehtiyat transformatorlarla təchiz edilməsi gözlənilməz qəza açılmalarında fasiləsizliyi təmin etməyə imkan verir.

Mənbəyə istinadən qeyd edək ki, cari ilin son üç ayı ərzində müəssisənin balans mənsubiyyətinə aid olan 10 kV-lik “Nizami”, “Həmənli”, I “Subartezan” və digər bir neşə hava xətlərində həyata keçirilmiş müxtəlif təyinatlı təmir işləri zamanı xətlərin trassasl yaşıl kütlədən təmişlənmiş, naqillər dartılmış, dayaqlar düzləndirilmiş və digər işlər görülmüşdür. Eyni zamanda həmin bu xətlərin 33,5 km-i təmir edilmiş, 1,5 km naqil və 17 dayaq yenilənmişdir. 0,4 kV-lik xətlərin isə 14,4 km-i təmir edilmiş, bir km naqil və 15 dayaq yenisi ilə əvəzlənmiş və 25-ə yaxın travers quraşdırılmışdır. Sözügedən dövrdə müəsissənin balans mənsubiyyətinə aid olan transformator məntəqələrinin 18-də müxtəlif təyinatlı təmir işləri həyata keçirilmişdir.

Onu da qeyd edək ki, görülən bütün məqsədyönlü tədbirlər həm enerji itkisinin qarşısının alınmasında, həm istehlakın dəqiqləşdirilməsində, həm də ümumi ödənişin artmasında öz müsbət nəticəsini göstərməkdədir. Belə ki, müəssisənin xidməti ərazisində cari ilin avqust ayında keçirilmiş reydlər zamanı 50-dən artıq (bunun 35-i məişət abonenti (əhali) istehlakçı qrupuna aiddir) istehlakçının sayğac uçot komplektində qüsur aşkar edilərək 411,2 min kilovatsaata yaxın (bunun 106,9 min kilovatsaata yaxını məişət abonenti (əhali) istehlakçı qrupuna aiddir)  itirilmiş elektrik enerjisinin 24,7 min manata yaxın istehlak dəyəri bərpa edilmişdir.

Yeri gəlmişkən, 2013-cü ilin 8 ayı ərzində isə 390-a yaxın istehlakçının (bunun 248-i məişət abonenti (əhali) istehlakçı qrupuna aiddir) elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış, 3 milyon 69,9 min kilovatsaata yaxın (bunun 819,8 min kilovatsaatdan çoxu məişət abonenti (əhali) istehlakçı qrupuna aiddir) itirilmiş elektrik enerjisinin 184,2 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğlə yanaşı, ötən ildən aktlara görə yaranmış debitor borcun da müəyyən hissəsininin ödənişi təmin edilmişdir.

Mənbə onu da bildirdi ki, cari ilin avqust ayında müəssisə üzrə 20,5 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövründəki istehlakla müqayisədə 2,1 milyon kilovatsaata yaxın çoxdur. Ödəniş isə ötən ilin müvafiq dövründəki göstərici ilə müqayisədə mütləq 17 faizdən çox artmışdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 912 min kilovatsaata yaxın azalaraq 3 milyon kilovatsaata yaxın olmuşdur.

Onu da qeyd etmək yerinə düşərdi ki, cari ilin 8 ayı ərzində müəssisə üzrə istehlak ötən ilin müvafiq dövrü ilə müqayisədə 4,9 milyon kilovatsaatdan çox artaraq 145,3 milyon kilovatsaata yaxın olmuşdur. Ödənişdə mütləq artım isə 9 faizdən artıq olmuşdur. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 6,5 milyon kilovatsaatdan çox azalaraq 25,5 milyon kilovatsaatdan artıq olmuşdur. Ödənişdə isə 6 faizdən çox mütləq artım olmuşdur. Sonda onu da qeyd edək ki, başlanan tədbirlərin növbəti rüblərdə də davam etdirilməsi nəzərdə tutulur.