Şəbəkədə payız-qış mövsümünə hazırlıq tədbirləri sistemli şəkildə davam etdirilir. Bu məqsədlə dayanıqlılığın daha da artırılması üçün keçən ildən çoxlu sayda lazımi avadanlıqların alınması təmin olunub. “Hövsan” yarımstansiyasında 110 kilovoltluq yağ açarları eleqaz açarları ilə əvəz olunub. “Ramanı” və “8 km”yarımstansiyalarında isə ayrıcılar dəyişdirilib, eleqaz açarları quraşdırılıb.

“Azərenerji” ASC-nin Mətbuat xidmətinin Abşeron Regional Elektrik Şəbəkəsindən əldə etdiyi məlumatda belə bildirilir. Məlumata görə, İnkişaf proqramı əsasında Bakı qəsəbələrindəki bütün 110 və 220 kilovoltluq avadanlıqlarda və hava xətlərində yenidənqurma işləri aparılır. Həmin xətlər (“Şimal”, “Dübəndi” EVX-lər) yenisi ilə əvəz olunub və nəzərdə tutulan tədbirlər hazırda da davam etdirilir.

Balaxanı Məişət Tullantıları Zavodunda istehsal olunan elektrik enerjisinin enerjisistemə ötürülməsi üçün yaxınlıqda inşa olunan  “Təmiz şəhər” yarımstansiyası da artıq şəbəkənin balansına verilib. Həmin elektrik enerjisi də  III “Ramanı” və III “Maştağa” xətti vasitəsilə sistemə ötürülür. Bununla əlaqədar “Ramanı” yarımstansiyasından “Təmiz şə­hər” yarımstansiyasına gedən xəttin yenisi ilə dəyişdirilməsi istiqamətində də işlər gedir. Həm­çinin oradan çıxan III “Maş­tağa” xətti də yenisi ilə əvəzlənir.

220 kilovoltluq “Zabrat” yarımstansiyasının işə buraxılması prosesi də başa çatdırılıb ki, bu da şəbəkə üzrə icra olunan layihələr arasında ən uğurlusu sayıla bilər. Orada hər birinin gücü 80 MVA olan 2 ədəd avtotransformator quraşdırılıb. Hazırda bura həm 220 kV-lik “Sənaye qovşağı” yarımstansiyasından, həm də “Sumqayıt Elektrik Stansiyası”n­dan ikinci xətt daxil olur. Bunlar isə 220 kV-lik “Hövsan” yarımstansiyası ilə əlaqələndirilib. Beləliklə də xətlərin yükü uyğun şəkildə paylanaraq dayanıqlığın artırılması, baş verə biləcək qəza halında tələbatçıların fasiləsiz elektrik enerjisi ilə təmin olunması üçün təminat yaradılıb.

Hazırda 220 kV-lik “Zabrat” yarımstansiyasından 110 kV-lik kabel xətləri ilə 110 kV-lik “Zabrat”, “Maştağa”, “Suraxanı” yarımstansiyaları və II “Maştağa” hava xətləri ilə “Sumqayıt Elektrik Stansiyası” əlaqələndiriləcək. Bu da şəbəkənin normal iş rejimində fəaliyyət göstərməsinə əhəmiy­yətli təsir göstərmiş olacaq.

110 kV-lik “Zabrat” yarımstansiyasında 10 kV-lik  yeni paylayıcı quruluşun  tikilməsi də aparılan işlərin məntiqi davamıdır.

Enerjisistemin ən güclü ob­yektlərindən olan 500 kV-lik “Abşeron” yarımstansiyasında 400 MVA transformator yığılıb və hər 3 fazası hazır vəziyyətə gətirilib. “Səngəçal” yarımstansiyasında layihə əsasında 125 MVA-lıq transformator 200 MVA-lıqla dəyişdirilib və işlək vəziyyətdədir. “Puta” yarımstansiyasında 40 MVA-lıq transformatorun 63 MVA-lıqla əvəz olunması üçün bütün hazırlıq tədbirləri icra olunub.

“Bayraq Meydanı”nın yaxınlığında yerin altında inşa edilən üçmərtəbəli 110/35/6 kV-lik “Bayıl” yarımstansiyasının ta­mamlama işləri yekunlaşmaq üzrədir. Artıq orada hər biri 80 MVA olan 2 transformator sxemdədir. Yaxın zamanda bu enerji obyekti ilə də tələbatçıların elektrik enerjisi təminatı həyata keçiriləcək.