Digər elektrik şəbəkələrində (EŞ) olduğu kimi, istehlakçıların “Elektrik enerjisindən istifadə qaydaları”na (EEİQ) riayət etmələrinin yoxlanılması istiqamətində reydlər “Ucar elektrik şəbəkəsi”nin (EŞ) xidməti ərazilərində də davam etdirilir.

“Azərenerji” ASC-nin Mətbuat xidmətinə sözügedən müəssisədən daxil olan məlumata görə,  cari ilin avqust ayında müəssisənin xidməti ərazisində keçirilmiş reydlər zamanı 20-dən artıq istehlakçının (bunun 22-si məişət abonenti (əhali) istehlakçıları qrupuna aiddir) elektrik enerjisindən qeyri-qanunu istifadə etməsi faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 57,9 min kilovatsaatdan artıq (bunun 51,5 min kilovatsaatdan çoxu məişət abonenti (əhali) istehlakçıları qrupuna aiddir)  itirilmiş elektrik enerjisinin 3,5 min manata yaxın istehlak dəyəri bərpa edilmişdir.

Qeyd edək ki, cari ilin 8 ayı ərzində isə müəssisə üzrə 270-dən artıq (bunun 240-ı məişət abonenti (əhali) istehlakçıları qrupuna aiddir) qayda pozuntusu aşkar edilərək bir milyon 47,7 min kilovatsaatdan artıq (bunun 822,3 min kilovatsaata yaxını məişət abonenti (əhali) istehlakçıları qrupuna aiddir)  itirilmiş elektrik enerjisinin 62,9 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğlə yanaşı, ötən ildə aktlara görə yaranmış debitor borcun da müəyyən hissəsinin ödənişi təmin edilmişdir.

İstehlakçıların dayanıqlı və keyfiyyətli elektrik enerjisi ilə təmin edilməsi, sayğac uçot komplektinin “Elektrik enrjisindən istifadə qaydaları”na uygun xüsusi qutularda, baxış üçün maneəsiz yerdə  quraşdırılması və digət təşkilati tədbirlərlə bağlı şəbəkələrdə aparılan yenidənqurma işlərindən söz açan mənbə onu da bildirdi ki, cari ilin son üç ayı ərzində 10 kV-lik “II Kənd”, “Yuxarı Şilyan”, III “Kənd” və “Broyler” hava xətlərində həyata keçirilmiş müxtəlif təyinatlı təmir işləri zamanı xətlərin 6,6 kilometri də təmir olunmuşdur. Eyni zamanda 1,8 km uzunluğunda naqil, 6 dayaq dəyişdirilmiş və eyni sayda travers quraşdırılmışdır. 0,4 kV-lik xətlərin isə 8,9 kilometri təmir olunmuş, 4,1 km-ə yaxın naqil, 8 dayaq dəyişdirilmişdir. Mənbəyə istinadən onu da qeyd edək ki, sözügedən dövrdə müəssisənin balans mənsubiyyətinə aid olan 80-dən artıq transformator məntəqəsində müxtəlif təyinatlı təmir işləri həyata keçirilmişdir.

Mənbədən daxil olan məlumata istinadən qeyd edək ki, təsdiq edilmiş plan-qrafikdə nəzərdə tutulmuş və istismar zamanı mövcud olan digər təmir-bərpa işlərinin müvəffəqiyyətlə həyata keçirilməsi istiqamətində hazırda tədbirlər davam etdirilir.

Mənbədən əldə edilən digər bir məlumata görə, cari ilin avqust ayında müəssisənin xidməti ərazisində 5,8  milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 41,1 min kilovatsaat azdır. O cümlədən, daimi əhali istehlakçı qrupu tərəfindən istehlak 2,5 milyon kilovatsaatdan artıq olmuşdur. Nəticədə ötən ilin eyni dövrü ilə müqayisədə istehlak 215 min kilovatsaat azalmış, ödənişdə mütləq artım isə 14 faizə yaxın olmuşdur.

Onu da qeyd  edək ki, cari ilin 8 ayı ərzində müəssisə üzrə istehlak ötən ilin eyni dövründəki istehlakla müqayisədə 2,7 milyon kilovatsaata yaxın azalaraq 46,5 milyon kilovatsaata yaxın olmuşdur. Ödənişdə mütləq artım isə 7 faizə yaxın olmuşdur.  O cümlədən, daimi əhali istehlakçı qrupu üzrə bu göstəricilər müvafiq olaraq 1,8 milyon kilovatsaata yaxın, 20,5 milyon kilovatsaata yaxın və 13 faizdən artıq olmuşdur

Yeri gəlmişkən, mövcud iqlim şəraiti ilə bağlı  yanğın təhlükəsizliyi məsələsi daima diqqət mərkəzində saxlanılır. Ərazi quru otlardan və yanğın törədə biləcək tullantılardan təmizlənmiş və yağ tutumlu avadanlıqların alt hissəsindəki yağ çınqıllar yeni təmiz çınqıllarla əvəz edilmişdir.

Sonda onu da bildirək ki, növbəti mövsümün uğurla başa çatdırılması istiqamətində enerji təchizatçıları öhdələrinə düşən vəzifələri layiqincə yerinə yetirməyə çalışırlar.