Digər elektrik şəbəkələrində (EŞ) olduğu kimi Şəmkir EŞ-də də istehlakçıların keyfiyyətli və dayanıqlı elektrik enerjisi ilə təmin olunması, gələcəkdə yarana biləcək problemlərin qarşısının alınması məqsədilə transformator məntəqələrində, elektrik veriliş xətlərində əsaslı və cari təmir işləri yerinə yetirilir. Bu da öz növbəsində sayğac sxemlərinə müdaxilə hallarının qarşısının alınmasında əhəmiyyətli rol oynayır. Ümumiyyətlə, elektrik enerjisindən istifadə zamanı qaydaların pozulmasının qarşısının alınması istiqamətində də xeyli işlər görülmüş və bu istiqamətdə tədbirlər davam etdirilir.

Sözügedən EŞ-dən “Azərenerji” ASC-nin Mətbuat xidmətinə daxilolan məlumatda belə qeyd edilir və o da bildirilir ki, müəssisənin xidməti ərazisində elektrik enerjisindən istifadə qaydalarının pozulması hallarının qarşısının alınması üçün mütəmadi reydlər keçirilir.

Qeyd edək ki, cari ilin avqust ayında keçirilmiş reydlər zamanı 55 qayda pozuntusu faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış, 259,8 min  kilovatsaatdan artıq itirilmiş elektrik enerjisinin 15,6 min manata yaxın istehlak dəyəri bərpa edilmişdir.

Yeri gəlmişkən, cari ilin 8 ayı ərzində keçirilmiş reydlər zamanı 500-ə yaxın istehlakçının sayğac uçot komplektində qüsur aşkar edilərək 8 milyon 853,7 min kilovatsaata yaxın itirilmiş elektrik enerjisinin 531,2 min manatdan artıq istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 88 faizə yaxınının ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Onu da qeyd edək ki, elektrik enerjisindən istifadə qaydalarının pozulmasında sayğacdan kənar xətt vasitəsilə enerjidən istifadə halına daha çox rast gəlinir.

Mənbə onu da bidirdi ki, cari ilin 8 ayı ərzində aşkar edilmiş qayda pozuntularına görə 27 istehlakçı barəsində toplanmış sənədlər tədbir görülməsi üçün hüquq mühafizə orqanlarına göndərilmişdir.

Mənbədən cari ilin 8 ayı ərzində həyata keçirilmiş təmir işləri barəsində əldə etdiyimiz məlumatda o da qeyd edilir ki, müəssisənin balans mənsubiyyətinə aid olan 10 KV-lik EVX-lərdə həyata keçirilmiş təmir işləri zamanı 19 kilometrdən artıq naqil, 10 dayaq, xeyli sayda xətt armaturu və izolyator işlədilmişdir. Eyni zamanda sayğac üçüot komplektinə nəzarətin gücləndirilməsi, tranformatorların yüklərinin bölünməsi və s ilə əlaqədar 0,4 KV-lik xətlərdə həyata keçirilmiş yenidənqurma işləri zamanı 21 kilometrə yaxın xətt təmir edilmişdir.  780-a yaxın isə sayğac quraşdırılmışdır.

Mənbə onu da bildirdi ki, sözügedən dövürdə müəssisənin xidməti ərazisində olan transformator və ya komplekt transformator məntəqələrinin (TM və ya KTM) 240-a yaxınında müxtəlif təyinatlı təmir işləri həyata keçirilmişdir. Eyni zamanda ümumi gücü 5,5 MVA-dan artıq olan 27  tarnsformator da təmir edilərək istehlakçıların istifadəsinə verilmişdir. Bütün bunlarla yanaşı  bir ədəd KRN quraşdırılmışdır.

Onu da qeyd etmək yerinə düşərdi ki, yanğın təhlükəsizliyi tədbirlərinə uyğun olaraq TM-də, paylayıcı quruluşda, xətlərin mühafizə zonalarında baş verəbiləcək hər hansı bir xoşagəlməz hadisənin qarşısının vaxtında alınması məqsədilə daimi baxışlar keçirilir və aşkar edilmiş nöqsanlar təcili aradan qaldırılır.

Mənbəyə istinadən onu da qeyd edək ki, müəssisə üzrə cari ilin avqust ayında ümumilikdə 30,7 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 5,1 milyon kilovatsaata yaxın azdır. Ödəniş isə ötən ilin eyni dövrü ilə müqayisədə müəyyən qədər mütləq artmışdır. O cümlədən, daimi əhali istehlakçı qrupunda isə 6,1 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 5 faizə yaxın artmışdır.

Mənbədən əldə etdiyimiz digər bir məlumata görə, cari ilin 8 ayı ərzində isə ümumi istehlak ötən ilin müvafiq dövrü ilə müqayisədə 750 min kilovatsaata yaxın azalaraq 207,6 milyon kilovatsaatdan artıq olmuşdur. Ödənişdə mütləq artım isə 8 faizə yaxın olmuşdur.  O cümlədən, daimi əhali istehlakçı qrupunda isə istehlak 58,6 milyon kilovatsaatdan artıq olmuşdur. Nətəcədə ötən ilin müvafiq dövrü ilə müqayisədə istehlak 3,2 milyon kilovatsaatdan çox, ödəniş isə mütləq 4 faizə yaxın artmışdır.

Sonda onu da qeyd edək ki,  enerji təchizatının daha da dayanıqlı təmin edilməsi istiqamətində görülən işlər davam etdirilir.