Ötürücü sistemin dayanıqlı fəaliyyətinin daha da yaxşılaşdırılması məqsədilə şəbəkələrdə müasir avadanlıqların tətbiqinə xüsusi diqqət yetirilir. Bunlardan biri də təkmil və qənaətli eleqaz tipli açarlardır.

“Azərenerji” ASC-nin Mətbuat xidməti bildirir ki, eleqaz açarlarının tətbiqi bütün enerjisistemi əhatə edir. İlk növbədə, 220 və 110 kV-lik yarımstansiyalarda bu tipli açarlar quraşdırılır. Abşeron REŞ üzrə 220 kilovoltluq “Səngəçal” və “Hövsan” yarımstansiyalarının 110 kilovoltluq hissələrində, 110 kV-lik “Zığ”,  “8-ci km” yarımstansiyalarında bu işlər həyata keçirilib. Mingəçevir REŞ üzrə isə müvafiq proses 110 kV-lik “Ucar” yarımstansiyasında başa çatdırılıb. “Ağsu”, “Bərdə” və “Göyçay” yarımstansiyalarında işlər davam etdirilir. Gəncə REŞ-in “Gəncə 1”, “Gəncə 3” və “Maşınqayırma” yarımstansiyalarında da eleqaz açarlarının quraşdırılması yekunlaşıb.

Qeyd olunan istiqamət üzrə Şirvan REŞ-də reallaşdırılan tədbirlərə gəldikdə isə “Masallı” və “Cənub” yarımstansiyalarında müvafiq işlər başa çatdırılıb, “Ələt” yarımstansiyasında isə davam etdirilir.  Şəki REŞ-in xidməti ərazisi üzrə qeyd olunan tədbirlər yalnız “Şəki”, İmişli REŞ üzrə isə “Kürdəmir” və “Sabirabad” yarımstansiyalarında həyata keçirilib.

Respublikamızın şimal bölgəsinin elektrik enerjisi   təchizatının yüksək səviyyədə təmin olunmasına xidmət göstərən Xaçmaz REŞ üzrə “Qusar”, “Şabran” və “Xudat” yarımstansiyalarındakı 110 kV-lik hissədə işlər yekunlaşıb, “Quba” yarımstansiyasında davam etdirilir.

Yeri gəlmişkən, yağ açarlarının eleqaz açarları ilə əvəzlənməsi bundan sonra da davam etdiriləcək və bu da öz növbəsində enerjisistemin inkişafına əhəmiyyətli töhfəsini vermiş olacaqdır.