“Ağdam Elektrik Şəbəkə”sinin xidmət göstərdiyi istehlakçıların daha da dayanıqlı və keyfiyyətli elektrik enerjisi ilə təmin edilməsi, sayğac uçot komplektinin “Elektrik Enerjisindən İstifadə Qaydaları”na uyğun xüsusi qutularda, baxış üçün maneəsiz yerdə  quraşdırılması və digər təşkilatı tədbirlərlə bağlı şəbəkələrdə müvafiq yenidənqurma və təmir işləri aparılır.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, son üç ay ərzində müəssisənin balans mənsubiyyətinə aid olan 10 kV-lik xətlərin 1,3 km-i yeni naqillə əvəzlənmiş, 15-dən artıq dayaq dəyişdirilmiş və 8 travers quraşdırılmışdır. Eyni zamanda 3.7 km xəttdə təmir işləri həyata keçirilmişdir. 0,4 kV-lik xətlərin 5,1 kilometri yenisi ilə əvəzlənmiş və 6,2 kilometri isə təmir edilmişdir. Paralel olaraq 10 və 0,4 kV-lik xətlərdə dayaqlar düzləndirilmiş, naqillərin qabariti bərpa olunmuş və trassası yaşıl kütlədən təmizlənmişdir.

Mənbəyə istinadən qeyd edək ki, sözügedən dövrdə müəssisənin balans mənsubiyyətinə aid olan 32  TM-də əsaslı və cari təmir işləri aparılmışdır.

“Mütəmadi reydlərin keçirilməsinə və digər təşkilatı tədbirlərə baxmayaraq hələ də bu və ya digər şəkildə  sayğac sxeminə mudaxilə, kənar xətt vasitəsilə elektrik enerjisindən istifadə halları var. Məqsədimiz bu pozuntu faktlarını vaxtında aşkar edərək onların qarşısını almaqdır” – deyən mənbə “Elektrik Enerjisindən İstifadə Qaydaları”nın pozulmasına görə keçırılmış reydlər zamanı aşkar edilmiş nöqsanlar barəsində də məlumat verdi.

Mənbədən verilən məlumata görə, cari ilin iyul ayında 24 qayda pozuntusu aşkar edilmişdir. Nəticədə 258,8 min kilovatsaatdan artıq itirilmiş elektrik enerjisinin 15,5 min manatdan çox istehlak dəyəri bərpa edilmişdir.

Qeyd edək ki, cari ilin 7 ayı ərzində 320-dən artıq anoloji fakt qeydə alınaraq, 4 milyon 307,2 min kilovatsaatdan artıq itirilmiş elektrik enerjisinin 258,4 min manatdan çox istehlak dəyəri bərpa edilmişdir. Həyata keçirilmiş məqsədyönlü tədbirlər nəticəsində həmin bu məbləğlə yanaşı ötən ildən aktlara görə yaranmış debitor borcunda müəyyən hissəsinin ödənilməsi təmin edilmişdir.

Qayda pozuntularının xarakterindən və istehlakçı qrupu üzrə təsnifatından söz açan mənbə kənar xətt vasitəsilə elektrik enerjisindən istifadə edilməsi halının üstünlük təşkil etdiyini və ən çox məişət abonenti (əhali) istehlakçı qrupunda qayda pozuntusunun  aşkar edildiyini bildirdi.

Onu da qeyd etmək yerinə düşərdi ki, müəssisə üzrə cari ilin iyul ayında ümumilikdə 18,8 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 1,7 milyon kilovatsaata yaxın çoxdur. Ödəniş isə ötən ilin eyni dövrü ilə müqayisədə mütləq 3 faizə yaxın artmışdır. O cümlədən, daimi əhali istehlakçı qrupunda 770 min kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 53 faizə yaxın azalmışdır.

Yeri gəlmişkən, cari ilin 7 ayı ərzində  ümumi istehlak ötən ilin müvafiq dövrü ilə müqayisədə 6,5 milyon kilovatsaata yaxın azalaraq 112,2 milyon kilovatsaata yaxın olmuşdur. Ödənişdə mütləq artım isə 19 faizə yaxındır.  O cümlədən, daimi əhali istehlakçı qrupunda istehlak 6,7 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 2,6 milyon kilovatsaatdan çox azalmış, ödəniş isə mütləq 8 faizdən çox artmışdır.