Yevlax Elektrik Şəbəkəsinin kollektivi növbəti payız-qış mövsümünə ciddi hazırlıq görür. Müvafiq tədbirlər planına uyğun olaraq, görülən işlərin miqyası genişdir. Son üç ay ərzində müxtəlif gücə malik olan üç ədəd 10/0,4 kilovoltluq transformator əsaslı təmir edilərək istismara verilmiş, dörd TM-də isə əsaslı təmir işləri aparılmışdır. 0,4 və 10 kV-lik hava xətlərində xeyli sayda dəmir-beton dayağın yenilənməsi təmin edilmişdir.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, rayonun elektroenergetika təsərrüfatının normal vəziyyətə gətirilməsinə də xüsusi diqqət yetirilir. Belə ki, son üç ay ərzində 110/35/6 kV-lik Mingəçevir “Şəhər” yarımstansiyasından çıxan 6 kV-lik 54-cü, Xanabad, Meyvəli, Nemətabad və digər xətlərdə həyata keçirilmiş müxtəlif təyinatlı təmir işləri zamanı  4 km-ə yaxın xətt əsaslı və cari təmir edilmiş, 10-dan artıq dayaq və 5 travers də quraşdırılmışdır. Həmin tədbirlər çərçivəsində müəssisənin balans mənsubiyyətinə aid olan 0,4 kV-lik xətlərdə isə 1,5 km naqil dəyişdirilmiş və 20-dən çox ağac dayaq dəmir-beton dayaqla əvəz edilmişdir.

Mənbə onu da bildirdi ki, əməkdaşlarımız tərəfindən elektrik enerjisindən qeyri qanuni istifadə hallarının qarşısı vaxtında alınır və həmin istehlakçılar barəsində müvafiq tədbirlər görülür. Belə ki, cari ilin 7 ayı ərzində müəssisənin xidməti ərazisində keçirilmiş reydlər zamanı 245-dən çox istehlakçının (bunun 214-ü məişət abonenti (əhali) istehlakçılar qrupuna aiddir) sayğac uçot komplektində qüsur aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 1 milyon 974,8 min  kilovatsaata yaxın (bunun 1 milyon 102,5 min kilovatsaatdan artığı məişət abonenti (əhali) istehlakçılar qrupuna aiddir) itirilmiş elektrik enerjisinin 118,5 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 78 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

O cümlədən, cari ilin iyul ayında aşkar edilmiş 46 qayda pozuntusuna görə (bunun 33-ü məişət abonenti (əhali) istehlakçılar qrupuna aiddir) 759,1 min kilovatsaata yaxın (bunun 209,1 min kilovatsaatdan çoxu məişət abonenti (əhali) istehlakçılar qrupuna aiddir) itirilmiş elektrik enerjisinin 45,5 min manatdan artıq istehlak dəyəri bərpa edilmişdir.

Mənbədən əldə etdiyimiz digər bir məlumata görə, müəssisə üzrə cari ilin iyul ayında ümumilikdə 12,1 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 891 min kilovatsaat çoxdur. Hesabat dövründə ümumi ödəniş isə ötən ilin müvafiq dövründəki göstərici ilə müqayisədə mütləq 3 faizdən çox artmışdır. O cümlədən, daimi əhali istehlakçı qrupunda 4,3 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 241 min kilovatsaata yaxın azalmış, ödəniş isə mütləq 7 faizdən çox artmışdır.

Yeri gəlmişkən, cari ilin 7 ayı ərzində ümumi istehlak ötən ilin müvafiq dövrü ilə müqayisədə 1,7 milyon kilovatsaatdan çox artaraq 77,9 milyon kilovatsaata yaxın olmuşdur. Ödənişdə mütləq artım isə 6,8 faiz olmuşdur. O cümlədən, daimi əhali istehlakçı qrupunda istehlak 27,6 milyon kilovatsaatdan artıq olmuşdur. Nəticədə ötən ilin müvafiq dövrü ilə müqayisədə istehlak 1,6 milyon kilovatsaata yaxın azalmış, ödənişdə mütləq artım isə 10 faizə yaxın olmuşdur.