İstehlakçıların dayanıqlı və keyfiyyətli elektrik enerjisi ilə təmin edilməsi məqsədilə müxtəlif gərginlikli paylayıcı və ötürücü qurğularda əsaslı və cari təmir işlərinin yerinə yetirilməsi, itkilərin azaldılması energetiklərin  ən mühüm vəzifələrindən biridir. Şəbəkələrin mövsümə hazırlanması ilə bağlı həyata keçirilmiş məqsədyönlü tədbirlər nəticəsində mövcud iqlim şəraitində xoşagəlməz hadisələr baş verməmişdir. İstehlakçıların elektrik enerjisi təchizatında daha da yüksək kəmiyyət və keyfiyyət dəyişikliyinə nail olunmuşdur.

Quba Elektrik Şəbəkəsindən “Azərenerji” ASC-nin Mətbuat xidmətinə verilən məlumata əsasən, şəbəkədə əsaslı və cari təmir işləri davam etdirilir. Belə ki, cari ilin son üç ayı ərzində 10 kV-lik Vəl-vələ HX-də həyata keçirilmiş təmir işləri zamanı 8 dayaq və xeyli sayda izolyator və iki kilometr naqil yenisi ilə əvəzlənmişdir.  Bələdiyyə, İnqubator, Kupçal və digər bir neçə hava xəttində (HX) həyata keçirilmiş təmir işləri zamanı 10 və 6 kV-lik xətlərdə 20,1  kilometrdən artıq və 0,4 kV-lik xətlərdə isə 11,5 km naqil əsaslı və cari təmir edilmişdir. Eyni zamanda 64 dayaq yenisi ilə əvəzlənmiş və 3 km-ə yaxın SİP kabel xətti çəkilmişdir. Sözügedən gərginlikli xətlərin 15 km məsafəsində budama işləri, 4 km məsafəsində sallaq naqillərin tarımlanması, 35 dayağın düzləndirilməsi və s. istismar işləri aparılmış və bu işlər daima davam etdirilir.

Mənbəyə istinadən qeyd edək ki, təmir zamanı müəssisənin balans mənsubiyyətinə aid olan 46 TM-də müxtəlif təyinatlı təmir işlər aparılmış, 30-a yaxın transformatora yağ əlavə edilmişdir. Eyni zamanda texnoloji itkilərin azaldılması məqsədilə Tülər, Digah və Yenikənd kəndlərində müvafiq olaraq 100 və 160 KVA-lıq transformatorlar daha güclüsü ilə əvəzlənmişdir. Bütün bunlarla yanaşı müxtəlif gücdə iki transfortmatorda təmir edilərək istehlakçıların istifadəsinə verilmişdir.

“Elektrik Enerjisindən İstifadə Qaydaları”nın pozulmasına görə keçirilmiş reydlər zamanı aşkar edilmiş nöqsanlar barəsində əldə etdiyimiz məlumata istinadən bildirək ki, cari ilin iyul ayında müəssisənin xidməti ərazisində keçirilmiş reydlər zamanı 44 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları üzrə tərtib edilmiş aktlara əsasən müvafiq qaydada hesabatlar aparılaraq 42,8 min  kilovatsaata yaxın (bunun 21,2 min kilovatsaata yaxını məişət abonenti (əhali) istehlakçılar qrupuna aiddir) itirilmiş elektrik enerjisinin 2,6 min manata yaxın istehlak dəyəri bərpa edilmişdir.

Cari ilin 7 ayı ərzində isə aşkar edilmiş qayda pozuntularına görə 660-dan artıq akt tərtib olunmuş, 1 milyon 585,7 min kilovatsaatdan artıq (bunun 1 milyon 176,8 min kilovatsaata yaxını məişət abonenti (əhali) istehlakçılar qrupuna aiddir) itirilmiş elektrik enerjisinin 95,1 min manatdan artıq istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin müəyyən hissəsinin ödənişi təmin edilmiş və qalan hissənin ödənilməsi istiqamətində də müvafiq tədbirlər həyata keçirilir.

Verilən məlumata əsasən, müəssisə üzrə cari ilin iyul ayında ümumilikdə 10,9 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 434 min kilovatsaat azdır. Daimi əhali istehlakçı qrupunda 6 milyon kilovatsaata yaxın elektrik enerjisi istehlak edilmişdir. Bu da ötən ilin müvafiq dövrü ilə müqayisədə istehlak 770 min kilovatsaata yaxın azalmış, ödənişdə isə mütləq artım 3 faizdən artıq olmuşdur.

Yeri gəlmişkən, cari ilin 7 ayı ərzində ümumi istehlak ötən ilin müvafiq dövrü ilə müqayisədə 4 milyon kilovatsaatdan çox artaraq 76,3 milyon kilovatsaata yaxın olmuşdur. Ödənişdə mütləq artım isə 17 faizə yaxın olmuşdur. O cümlədən, daimi əhali istehlakçı qrupunda isə istehlak 42,2 milyon kilovatsaata yaxın olmuşdur. Nətəcədə ötən ilin müvafiq dövrü ilə müqayisədə istehlak 1,5 milyon kilovatsaatdan çox azalmış, ödənişdə mütləq artım isə 7 faizə yaxın olmuşdur.