Digər enerji obyektlərində olduğu kimi Şəki, Zaqatala, Balakən, Qax, Oğuz, İsmayıllı və Qəbələ elektrik şəbəkə rayonlarında da istehlakçıların elektrik enerjisi təchizatında yaranacaq hər hansı bir problemin qarşısının vaxtında alınması məqsədilə  ənənəvi olaraq yarımstansiya və elektrik verilişi xətlərində  təmir-bərpa və yenidənqurma işləri həyata keçirilir. Həyata keçirilən məqsədyönlü tədbirlər bölgənin enerji təsərrüfatında dayanıqlığı daha da artırıb.

Sözügedən elektrik şəbəkələrini əlaqələndirən “Şəki Regional Elektrik Şəbəkəsi”ndən “Azərenerji” ASC-nin Mətbuat xidmətinə  daxil olan məlumata görə, müəssisənin balans mənsubiyyətinə aid olan 35 kilovoltluq və ondan yuxarı gərginlikli EVX-lərdə cari ilin son üç ayı ərzində həyata keçirilmiş müxtəlif təyinatlı təmir işləri zamanı naqillər təmir edilmiş və yenisi ilə əvəzlənmiş, izolyatorlar dəyişdirlmişdir. Buna misal olaraq 110 kV-lik I, II, III və IV Şəki, I, II Zaqatala, Bəhmətli, 35 kV-lik Çeşməli, Oğuz, Dəhnə və digər hava xətlərində (HX) görülmüş işləri göstərmək olar. Bütün bunlarla yanaşı sözügedən dövrdə 35 kV-lik Taxılçılıq HX-də dayaqların yenisi ilə əvəzlənməsi də görülmüş işlər siyahısındadır.

Qeyd edək ki, sözügedən dövrdə texniki göstəricilərin daha da yaxşılaşdırılması məqsədilə müəssisənin balans mənsubiyyətinə aid olan 110 kV-lik Katex, Şəki, Cəfərabad, 35 kV-lik Oğuz, Şorsu, A. Göynək və digər yarımstansiyalarında və onun yardımçı avadanlıqlarında əsaslı və cari təmir işləri yerinə yetirilmişdir. Təmir-bərpa işlərinə müxtəlif gücdə transformatorların,  yağ və vakkum açarlarının, ayrıcıların təmiri, yarımstansiyanın torpaqlanma konturunun bərpası və digər işlər daxildir.

“Bunlardan əlavə, xətlərdə baş verən enerji itkisinin qarşısının alınması məqsədilə də müəyyən tədbirlər həyata keçirilmişdir” – deyən mənbə yanğın təhlükəsizliyi tədbirləri barəsində də məlumat verdi və bildirdi ki, EVX-lərin mühafizə zonaları və yarımstansiyaların əraziləri quru otlardan, yağ tutumlu avadanlıqların ətrafı çirkli yağ örtüyündən təmizlənmişdir. Eyni zamanda mühafizə avadanlıqlarının nəzarət və ölçü cihazları təftiş edilmiş və aşkar edilmiş qüsurlar aradan qaldırılmışdır.

Mənbədən daxil olan məlumata görə, fövqəladə hallar nəzərə alınmazsa, müəssisə avadanlıqların texniki göstəricilikləri  baxımından  iqlim şəraitinə tam hazırdır.

Sonda mənbə onu da bildirdi ki, 110 kV-lik Zaqatala, Əlibəyli, Balakən, İsmayıllı, 35 kV-lik Yaqublu, Alazan və digər bir neçə yarımstansiyada transformatorların, boşaldıcıların və digər avadanlıqların təmiri də cari ilin qarşıdakı ayalarında nəzərdə tutulmuşdur.

Yeri gəlmişkən, icrası reallaşdırılan tədbirlər enerji ötürücülərində dayanıqlığın  yüksək səviyyədə təmin edilməsinə geniş imkanlar açır.