İstehlakçıların dayanıqlı və keyfiyyətli elektrik enerjisi ilə təmin edilməsi məqsədilə yarımstansiyalarda, ötürücü qurğularda əsaslı və cari təmir işlərinin yerinə yetirilməsi, itkilərin azaldılması energetklərin  ən mühüm vəzifələrindən biridir. Digər enerji obyektlərində olduğu kimi “Gəncə Regional Elektrik Şəbəkəsi”nin (REŞ) də  xidməti ərazilərində  bu istiqamətdə müvafiq tədbirlər həyata keçirilir. Ən əsası isə respublika enerjisistemi üçün strateji əhəmiyyətə malik sistem təşkiledici şəbəkə xüsusi diqqət mərkəzindədir.

Müəssisədən “Azərenerji” ASC-nin Mətbuat xidmətinə daxil olan məlumatda görə cari ilin son üç ayı ərzində balans mənsubiyyətinə aid olan 35 kV-lik və ondan yuxarı gərginlikli elektrik verilişi hava xətlərinin (EVHX)  də sözügedən dövr ərzində bir dayaq dəyişdirilmiş, 500 metrə yaxın müxtəlif markalı naqil və 1100-dən artıq izolyator yenisi ilə əvəz edilmişdir. Bununla yanaşı, həmin dövr ərzində hava xətlərinin trassası ağaclardan təmizlənmiş və işlər mütəmadi olaraq davam etdirilir.

Digər təmir işlərindən danışan mənbə onu da bildirdi ki, 110 kV-lik AzKTA yarımstansiyasında bir transformator yenisi ilə əvəzlənmiş, digər transformatorlar isə təmir edilmişdir. Eyni zamanda 110 kV-lik Gəncə-3 yarımstansiyasında 1 və 2 saylı 16 MVA-lıq transformatorlara və eyni gərginlikli seksiyalararası bölməyə eleqaz açarı quraşdırılmış, transformatorların 10 kV-lik giriş yağ açarı vakkum açarı ilə əvəzlənmişdir.

Bildirilir ki, həmin dövrdə 110 kV-lik Gəncə-1 yarımstansiyasında 2 saylı 31,5 MVA-lıq transformator, 35 kV-lik I və II Quşçuluq və I Göygöl HX-lərin yağ açarları təmir olunmuş, 110 kV-lik Gəncə-2 yarımstansiyasında 10 KV-lik şinlərarası yağ açarı vakkum açarı ilə əvəz olunmuşdur. Paralel olaraq bu yarımstansiyaların digər elektrik avadanlıqlarında da müxtəlif təyinatlı təmir işləri həyata keçirilmişdir.

Eyni zamanda, 110 kV-lik Maşınqayırma, Bağman və 35 kV-lik Gəncəçay yarımstansiyalarında da sözügedən dövrdə müxtəlif təyinatlı təmir işləri aparılmışdır.

Onu da qeyd etmək yerinə düşərdi ki, digər müəssisələrdə olduğu kimi burada da yanğın təhlükəsizliyi tədbirləri daim diqqət mərkəzindədir. Belə ki, mövcud hava şəraiti ilə əlaqədar olaraq sistem təşkiledici 110-500 kV-lik yarımstansiya və EVX-lərə növbədənkənar baxışlar keçirilmiş, ərazidən quru otlar təmizlənmiş, yarımstansiyaların bütün yağ tutumlu elektrik avadanlıqlarında yağın səviyyəsi yoxlanılmış və normal səviyyəyə gətirilmişdir.

Sonda onu da qeyd edək ki, Gəncə, Göygöl, Samux, Daşkəsən, Şəmkir, Tovuz, Ağstafa, Qazax və Gədəbəy EŞ-lərin xidməti ərazilərində yerləşən 10, 6 və 0,4 kV-lik şəbəkələrdə də cari ilin son üç ayı ərazisində böyük həcmdə yenidənqurma işləri aparılmış və bu işlər hazırda da davam etdirilir.