İstehlakçılara göstərilən  xidmətin keyfiyyətinin daha da yüksəldilməsi, texnoloji itkilərin müəyyən olunmuş həddə saxlanması, istehlak edilmiş elektrik enerjisinin sərfinə görə ödənişlərin yüksək həddə çatdırılması qarşımızda duran ən mühüm vəzifədir. Bütün bunlarla yanaşı elektrik enerjisindən istifadə zamanı qaydaların pozulmasının qarşısının alınması istiqamətində də tədbirlər mütəmadi olaraq davam etdirilir. Bu məqsədlə digər energetika müəssisələrində olduğu kimi Yardımlı Elektrik Şəbəkəsinin də (EŞ) balans mənsubiyyətinə aid olan EVX-lərdə və TM-lərdə müxtəlif təyinatlı təmir işləri aparılır.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, 2013-cü ilin arxada qalan ayları ərzində burada müəyyən irəliləyişə nail olunub.  O cümlədən, texniki-iqtisadi göstəricilər daha da yaxşılaşdırılıb. Şəbəkənin istismar səviyyəsini normal saxlamaq istiqamətində də işlər aparılıb. Belə ki, cari ilin son üç ayı ərzində 10 və 0,4 kV-lik EVX-lərdə ümumilikdə 2,1  km-dən artıq məsafədə əsaslı və cari təmir işləri həyata keçirilmiş, ümumi gücü 706 KVA olan  6 transfomator əsaslı təmir olunaraq yenidən şəbəkəyə qoşulmuşdur. Bütün bunlarla yanaşı 23 transfomator məntəqəsində də müxtəlif təyinatlı təmir işləri həyata keçirilmişdir.

Qeyd edək ki, elektrik enerjisindən qeyri qanuni istifadə hallarının qarşısının alınması istıqamətində də reydlər davam etdirilir. Belə ki, cari ilin iyul ayında müəssisənin xidməti ərazisində keçirilmiş reydlər zamanı 11 istehlakçının  “Elektrik Enerjisindən İstifadə Qaydaları”nı pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 20,5 min  kilovatsaata yaxın itirilmiş elektrik enerjisinin 1,2 min manatdan artıq istehlak dəyəri bərpa edilmişdir.

Onu da qeyd edək ki, cari ilin 7 ayı ərzində 70-dən artıq qayda pozuntusu faktı  aşkar edilərək, 241.5 min kilovatsaata yaxın itirilmiş elektrik enerjisinin 14,5 min manata yaxın istehlak dəyəri bərpa edilmişdi. Həyata keçirilən müvafiq tədbirlər nəticəsində həmin bu məbləğin 16 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. Qayda pozuntularının təsnifatına gəldikdə isə, kənar xətt vasitəsilə elektrik enerjisindən istifadə edilməsi halı üstünlük təşkil etmiş və ən çox məişət abonenti (əhali) istehlakçı qrupunda qayda pozuntusu  aşkar edilmişdir.

Mənbə onu da bildirdi ki, müəssisə üzrə cari ilin iyul ayında ümumilikdə 1,2 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 141 min kilovatsaat azdır. Hesabat dövründə ümumi ödəniş isə ötən ilin müvafiq dövründəki göstərici ilə müqayisədə mütləq 21 faizə yaxın artmışdır. O cümlədən, daimi əhali istehlakçı qrupunda  880 min kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 227 min kilovatsaata yaxın azalmış, ödənişdə mütləq artım 4 faizdən artıq olmuşdur.

Yeri gəlmişkən, cari ilin 7 ayı ərzində ümumi istehlak ötən ilin müvafiq dövrü ilə müqayisədə 797 min kilovatsaat artaraq 9,4 milyon kilovatsaata yaxın olmuşdur. Ödənişdə mütləq artım isə 19 faizə yaxın olmuşdur. O cümlədən, daimi əhali istehlakçı qrupunda istehlak 7.2 milyon kilovatsaata yaxın olmuşdur. Nətəcədə ötən ilin müvafiq dövrü ilə müqayisədə istehlak 248 min kilovatsaatdan çox artmış, ödənişdə mütləq artım isə 5 faizdən artıq olmuşdur.

“Şəbəkənin əməkçiləri əlverişli günlərdən yararlanaraq payız-qış mövsümünə möhkəm zəmin hazırlayırlar” -  deyən mənbə sonda onu da qeyd etdi ki, enerji təchizatının daha da dayanıqlı təmin edilməsi istiqamətində görülən işlər davam etdirilir. Hazırki iqlim şəraitini nəzərə alaraq, yanğın təhlükəsizliyinin təmin edilməsi məqsədilə də müvafiq tədbirlər həyata keçirilir.