Dağlar qoynunda yerləşən, mürəkkəb relyefi, sərt iqlim şəraiti ilə seçilən Şamaxı rayonunda istehlakçıları elektrik enerjisi ilə daha da keyfiyyətli təmin etmək üçün müvafiq tədbirlər həyata keçirilir. Qeyd edək ki, qış aylarında rayonun dağlıq ərazilərində ötürücü və paylayıcı şəbəkədə iqlim şəraiti ilə əlaqədar bəzən ciddi çətinliklər yaranır. Məhz buna görə də, qarşıdakı payız-qış mövsümünə indidən hərtərəfli hazırlıq görülür.

Rayon elektrik şəbəkəsindən “Azərenerji” ASC-nin Mətbuat xidmətinə verilən məlumata görə, payız-qış mövsümünə hazırlıq tədbirləri əvvəlcədən hazırlanıb təsdiq edilmiş plan-qrafik üzrə davam etdirilir. Enerji təchizatçıları əmindirlər ki, hazırda çəkilən əziyyət, görülən qabaqlayıcı tədbirlər havaların sərt keçdiyi, sərfiyyatın artdığı qış aylarında mütləq müsbət təsirini göstərəcəkdir. Bununla əlaqədar olaraq cari ilin son üç ayı ərzində 7 yarımstansiyada müxtəlif təyinatlı təmir işləri həyata keçirilmişdir. O cümlədən, Çarhan yarımstansiyasında üç, Hacıqədirli yarımstansiyasında isə iki gərginlik transformatoru yenisi ilə əvəzlənmişdir.

Qeyd edək ki, transformator məntəqələrinin təmiri, elektrik verilişi xətlərinin tarım çəkilməsi, zərurət yaranan yerlərdə dayaqların düzəldilməsi, yaxud da yenisi ilə dəyişdirilməsi görülən işlərin tərkib hissəsidir. Belə ki, sözügedən dövrdə 26 TM-də müxtəlif təyinatlı təmir işləri aparılmış və dörd transformatorda təmir edilərək istehlakçıların istifadəsinə verilmişdir.

“Şəbəkənin yenidən qurulması hazırda əsas prioritetlərdəndir” – deyən mənbə onu da bildirdi ki, cari ilin son üç ayı ərzində bir kilometrə yaxın SİP kabel xəttti çəkilmiş, 3,9 km-ə yaxın xətt yenilənmiş, eyni zamanda travers və dayaq da quraşdırılmışdır. Rayonda elektrik enerjisindən qeyri-qanuni istifadə hallarına yol verən istehlakçılara qarşı sərt tədbirlər görülür. Zərurət yarandıqda hüquq-mühafizə orqanlarına müraciət edilir ki, bu da çox vaxt təsirini göstərir. Belə ki,  cari ilin iyul ayında keçirilmiş reydlər zamanı 50-dən çox istehlakçının (bunun 41-i məişət abonenti (əhali) istehlakçıları qrupuna aiddir) elektrik enerjisindən istifadə qaydalarını pozması faktı aşkar edilərək, 150,7 min kilovatsaata yaxın (bunun 48,7 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 9 min manartdan artıq istehlak dəyəri bərpa edilmişdir.

Onu da qeyd edək ki, cari ilin 7 ayı ərzində müəssisə üzrə 175-dən çox (bunun 149-u məişət abonenti (əhali) istehlakçıları qrupuna aiddir) qayda pozuntusu aşkar edilərək 438,1 min kilovatsaata yaxın (bunun 208,9 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 26,3 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 65 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbə onu da bildirdi ki, cari ilin iyul ayında müəssisə üzrə 5,1 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 195 min kilovatsaat çoxdur. Ödəniş isə ötən ilin müvafiq dövrü ilə müqayisədə mütləq 7 faizə yaxın artmışdır. O cümlədən, daimi əhali istehlakçı qrupunda istehlak ötən ilin müvafiq dövrü ilə müqayisədə 34 min kilovatsaatdan çox artaraq, 3 milyon kilovatsaatdan artıq olmuşdur. Ötən ilin müvafiq dövrü ilə müqayisədə enerji haqqının ödənişində mütləq artım isə 11 faizə yaxın olmuşdur.

Yeri gəlmişkən, cari ilin 7 ayı ərzində müəssisə üşrə ümumi istehlak 36.2 milyon kilovatsaatdan artıq olmuşdur. Nəticədə ötən ilin müvafiq dövrü ilə müqayisədə istehlak 1,3 milyon kilovatsaatdan çox, ödəniş isə mütləq 7 faiz artmışdır.  O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 39 min kilovatsaata yaxın azalaraq 21,2 milyon kilovatsaata yaxın, ödənişdə mütləq artım isə 7  faizdən artıq olmuşdur.

Sonda onu da qeyd edək ki, kadrların təkmilləşdirilməsi məsələsi də şəbəkədə diqqətdə saxlanılır.