Digər elektrik şəbəkələrində (EŞ) olduğu kimi, istehlakçıların “Elektrik enerjisindən istifadə qaydaları”na (EEİQ) riayət etmələrinin yoxlanılması istiqamətində reydlər Tovuz EŞ-in xidməti ərazilərində də davam etdirilir.

“Azərenerji” ASC-nin Mətbuat xidmətinə sözügedən müəssisədən daxil olan məlumata görə,  cari ilin iyul ayı ərzində müəssisənin xidməti ərazisində keçirilmiş reydlər zamanı 45 istehlakçının elektrik enerjisindən qeyri-qanunu istifadə etməsi faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 822,8 min kilovatsaata yaxın itirilmiş elektrik enerjisinin 49,4 min manatdan artıq istehlak dəyəri bərpa edilmişdir.

Qeyd edək ki, cari ilin yeddi ayı ərzində müəssisə üzrə 330-dan artıq qayda pozuntusu aşkar edilərək 2 milyon 891,8 min kilovatsaata yaxın itirilmiş elektrik enerjisinin 173.5 min manatdan artıq istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 28 faizə yaxın hissəsinin ödənişi təmin edilmiş və qalan hissənin ödənilməsi istiqamətində də müvafiq tədbirlər həyata keçirilir.

İstehlakçıların dayanıqlı və keyfiyyətli elektrik enerjisi ilə təmin edilməsi, sayğac uçot komplektinin “Elektrik Enerjisindən İstifadə Qaydaları”na uyğun xüsusi qutularda, baxış üçün maneəsiz yerdə  quraşdırılması və digər təşkilatı tədbirlərlə bağlı şəbəkələrdə aparılan yenidənqurma işlərindən söz açan mənbə onu da bildirdi ki, cari ilin son üç ayı ərzində 10 və 6 kV-lik hava xətlərində həyata keçirilmiş müxtəlif təyinatlı təmir işləri zamanı xətlərin 4,5 kilometri, 0,4 kV-lik xətlərin də 1,5 kilometrə yaxın hissəsi təmir olunmuşdur. Eyni zamanda sözügedən dövrdə müəssisənin balans mənsubiyyətinə aid olan transformator məntəqələrinin 35-də müxtəlif təyinatlı təmir işləri də həyata keçirilmişdir. Təsdiq edilmiş plan-qrafikdə nəzərdə tutulmuş və istismar zamanı mövcud olan digər təmir-bərpa işlərinin müvəffəqiyyətlə həyata keçirilməsi istiqamətində də  hazırda tədbirlər davam etdirilir.

Mənbə onu da bildirdi ki, cari ilin iyul ayında müəssisə üzrə 12,5 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 773 min kilovatsaat çoxdur. O cümlədən, daimi əhali istehlakçı qrupunda istehlak ötən ilin müvafiq dövrü ilə müqayisədə 1,4 milyon kilovatsaatdan çox artaraq 5,3 milyon kilovatsaatdan artıq olmuşdur. Ötən ilin müvafiq dövrü ilə müqayisədə enerji haqqının ödənişində mütləq artım 14 faizə yaxın olmuşdur.

Onu da qeyd etmək yerinə düşərdi ki, cari ilin 7 ayı ərzində müəssisə üzrə ümumi istehlak 73,9 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 6,9 milyon kilovatsaatdan çox azalmışdır. O cümlədən, daimi əhali istehlakçı qrupunda istehlak ötən ilin eyni dövrü ilə müqayisədə 855 min kilovatsaat artaraq 30,9 milyon kilovatsaata, ödənişdə mütləq artım isə 7 faizə yaxın olmuşdur.

Yeri gəlmişkən, mövcud iqlim şəraiti ilə bağlı  yanğın təhlükəsizliyi məsələsi daima diqqət mərkəzində saxlanılır. TM-lərin ərazisi quru otlardan təmizlənmiş və yağ tutumlu avadanlıqların alt hissəsindəki yağ çınqıllar yeni təmiz çınqıllarla əvəz edilmiş və yanğın törədə biləcək tullantılardan təmizlənmişdir.