Şəbəkələrdə aparılan yenidənqurma işlərinə, sayğac uçot komplektlərinin xüsusi qutularda və baxış üçün maneəsiz  yerdə quraşdırılmasına, sayğac uçot komplektinə nəzarətin gücləndirilməsinə, onlarla  aparılan təbliğata baxmayaraq, sayğac sxeminə müdaxilə edən istehlakçılar hələ də var. Onlar əməkdaşlarımız tərəfindən vaxtında aşkar edilir və onlara qarşı daha sərt tədbirlər görülür. Cari ilin iyul ayında isə aşkar edilmiş qayda pozuntularından biri barəsində tədbir görülməsi üçün sənədlər hüquq mühafizə orqanlarına göndərilmişdir.

Göygöl Elektrik Şəbəkəsindən (EŞ) “Azərenerji” ASC-nin Mətbuat xidmətinə daxil olan məlumata görə, 2013-cü ilin 7 ayı ərzində müəssisənin xidməti ərazisində keçirilmiş reydlər zamanı 220 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 1 milyon  790,6 min kilovatsaat itirilmiş elektrik enerjisinin 107,4 min manatdan çox istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 46 faizdən artıq hissəsinin ödənişi təmin edilmiş və qalan hissənin ödənilməsi istiqamətində müvafiq tədbirlər həyata keçirilir.

Qeyd edək ki, cari ilin iyul ayında 31 qayda pozuntusu aşkar edilərək akt tərtib olunmuş, 302,6 min kilovatsaata yaxın itirilmiş elektrik enerjisinin 18.1 min manatdan çox istehlak dəyəri bərpa edilmişdir.

“Qayda pozuntularının qarşısının alınması istiqamətində həyata keçirilən tədbirlərdən biri də elektrik enerjisinin kart sistemi vasitəsilə həyata keçirilməsidir. Artıq sözügedən EŞ-in xidməti ərazisində bu istiqamətdə tədbirlər davam etdirilir” – deyən mənbə cari ilin son üç ayı ərzində həyata keçirilmiş təmir-bərpa işləri barəsində də məlumat verdi.

Mənbəyə istinadən onu da qeyd edək ki, sözügedən dövr ərzində yenidənqurma işləri ilə əlaqədar “smartkart” tipli sayğacların quraşdırılması məqsədilə sayğacların girişinə 280 metrə yaxın koaksial kabel çəkilmiş və 90-dan artıq sözügedən sayğac quraşdırılmışdır. Paralel olaraq 10 və 6 kV-lik xətlərin 3.7 kilometrdən artıq hissəsində də müxtəlif təyinatlı təmir işləri həyata keçirilmişdir. Eyni zamanda 0,4 kV-lik xətlərin də 6,4 km-dən artıq hissəsində təmir işləri aparılmışdır. Bütün bunlarla yanaşı 10, 6 və 0,4 kV-lik xətlərdə ümumilikdə 50 dayaq da quraşdırılmışdır.

Onu da qeyd etmək yerinə düşərdi ki, sözügedən dövr ərzində təmir işləri müəssisənin balans mənsubiyyətinə aid olan transformator məntəqələrindən (TM) də yan ötməmişdir. Belə ki, həmin bu dövrdə 23 TM-də müxtəlif təyinatlı təmir işləri həyata keçirilmiş, bir KTM quraşdırılaraq şəbəkəyə qoşulmuş və gücü 630 KVA olan üç transformator da istismara verilmişdir.

Mənbədən əldə etdiyimiz digər bir məlumata görə, cari ilin iyul ayında müəssisə üzrə 7,2 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövrü ilə müqayisədə 744 min kilovatsaat çoxdur.  İstehlak edilmiş elektrik enerjisinin dəyərinin ödənişi isə ötən ilin eyni dövründəki göstərici ilə müqayisədə mütləq artmışdır. O cümlədən, daimi əhali istehlakçı qrupunda istehlak ötən ilin müvafiq dövrü ilə müqayisədə 563 min kilovatsaata yaxın artaraq 2,3 milyon kilovatsaatdan çox, ödənişdə  mütləq artım isə 4 faizdən artıq olmuşdur.

Onu da qeyd edək ki, cari ilin yeddi ayı ərzində müəssisə üzrə istehlak ötən ilin müvafiq dövrü ilə müqayisədə 2,7 milyon kilovatsaatdan çox artaraq 51,6 milyon kilovatsaatdan artıq olmuşdur. Ödəniş isə ötən ilin müvafiq dövrü ilə müqayisədə mütləq 7,4 faiz artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 27 min kilovatsaata yaxın artaraq 14,5 milyon kilovatsaata yaxın olmuşdur. Ödənişdə mütləq artım isə 8 faizdən artıq olmuşdur.

Sonda onu da bildirək ki, şəbəkə üzrə yanğından mühafizə tədbirləri də daim diqqət mərkəzindədir. Növbəti mövsümün uğurla başa çatdırılması istiqamətində enerji təchizatçıları öhdələrinə düşən vəzifələri layiqincə yerinə yetirməyə çalışırlar.