Ümumi gücü 525 MVt olan “Sumqayıt” elektrik stansiyası da iqtisadi cəhətdən inkişaf edən Sumqayıt şəhərinin və Abşeron yarımadasının enerji təhlükəsizliyinin möhkəmləndirilməsini təmin etmişdir. Bundan əlavə enerjinin ötürülməsi və paylaşdırılması sistemlərinin dayanıqlı və sabit işləməsinin təmin edilməsində böyük rolu var.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, stansiya ötən dövrlərdə olduğu kimi cari ilin 7 ayı ərzində də dispetçer qrafikinə uyğun olaraq fəaliyyət göstərmiş və 1 milyard 787,8 milyon kilovatsaata yaxın elektrik enerjisi istehsal etmişdir. Avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsinin və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində elektrik enerjisi istehsalının digər texniki-istehsalat göstəriciləri üzrə də yüksək nəticələr əldə edilmişdir. Yeri gəlmişkən, cari ilin iyul ayında burada 255,6 milyon kilovatsaatdan artıq elektrik enerjisi istehsal edilmişdir.

“Stansiyanın avtomatik idarə olunma sisteminin müasir rəqəmsal texnologiya əsasında qurulması istismar prosesinin asanlaşdırılmasına və keyfiyyətin artırılmasına xidmət edir” – deyən mənbə onu da qeyd etdi ki, enerjisistemin 2013/2014 cü il payız-qış mövsü­mü­nə hazırlıq tədbirləri çərçivəsində müəssisədə cari ilin son 3 ayı ərzində də nəzərdə tutulmuş bütün tədbirlər vaxtında həyata keçirilib. Avadanlıqlara vaxtlı-vaxtında qrafik üzrə texniki xidmət göstərilmişdir. Görülən tədbirlər isə, heç şübhəsiz ki, qarşıdakı payız-qış mövsümündə elektrik enerjisinə artan tələbatın təmin olunmasına əhəmiyyətli təsirini göstərəcəkdir.

Onu da qeyd etmək yerinə düşərdi ki, digər enerji obyektlərində olduğu kimi burada da yanğın təhlükəsizliyi məsələsi daima diqqət mərkəzində saxlanılır. Sexlər, inzibati bina və yardımçı binalar yanğınsöndürmə avadanlıqları ilə təmin olunmuş, ərazi quru otlardan və yanğın törədə biləcək tullantılardan təmizlənmişdir. Eyni zamanda sözügedən dövrdə bir sıra yanğın texniki tədbirlər həyata keçirilmişdir.

Xatırladaq ki, iki ədəd qaz turbinləri və bir ədəd buxar turbini quraşdırılmış bu stansiyada dünya standartlarına cavab verən ən müasir avadanlıqlar quraşdırılmışdır. Bu elektrik stansiyası Təmiz İnkişaf Mexanizmi prinsipi ilə istismar olunur və 2010-cu ilin oktyabrın 15-də Birləşmiş Millətlər Təşkilatı tərəfindən respublika üzrə ilk dəfə olaraq qeydiyyata alınmışdır.