Əvvəlki illərdə olduğu kimi, cari ildə də İmişli Elektrik Şəbəkəsinin xidməti ərazisində olan tələbatçıların daha da dayanıqlı və keyfiyyətli elektrik enerjisi ilə təmin olunması istiqamətində lazımi addımlar atılıb. Cari işlərlə yanaşı, növbəti payız-qış mövsümünə hazırlıq tədbirləri də yüksək səviyyədə icra olunur.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, cari ilin iyul ayında müəssisə üzrə 14,4 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 711,2 min kilovatsaat çoxdur. Hesabat dövründə ümumi ödəniş ötən ilin müvafiq dövründəki göstərici ilə müqayisədə mütləq 24 faiz artmışdır. O cümlədən, daimi əhali istehlakçı qrupunda istehlak ötən ilin müvafiq dövrü ilə müqayisədə 154 min kilovatsaata yaxın artaraq 3,6 milyon kilovatsaata yaxın olmuşdur. Ötən ilin müvafiq dövrü ilə müqayisədə enerji haqqının ödənişində mütləq artım isə 22 faizə yaxın  olmuşdur.

Qeyd edək ki, cari ilin 7 ayı ərzində müəssisə üzrə ümumi istehlak 122,5 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 4,1 milyon kilovatsaata yaxın, ödəniş isə mütləq 3 faiz artmışdır. O cümlədən, daimi əhali istehlakçı qrupunda istehlak ötən ilin eyni dövrü ilə müqayisədə 6,4 milyon kilovatsaata yaxın artaraq 36 milyon kilovatsaatdan artıq, ödənişdə mütləq artım isə 10 faizə yaxın olmuşdur.

Mənbə onu da bildirdi ki, kənd və qəsəbələrdə enerji təchizatını yaxşılaşdırmaq istiqamətində tədbirlər davam etdirilir. Belə ki, cari ilin son üç ayı ərzində 10 kV-lik I, II və III Şəhər, Muğan, Telman, Otuziki və digər bir neçə HX-lərində həyata keçirilmiş müxtəlif təyinatlı təmir işləri zamanı 7,8 kilometrə yaxın naqil təmir edilmişdir.

Qeyd edək ki, təmir işləri zamanı 0,4 kV-lik xətlərin 4,5 km-ə yaxın hissəsidə əsaslı və cari təmir olunmuşdur. Eyni zamanda rayon ərazisi üzrə müxtəlif gücdə olan 50-dən artıq transformator təmir edilərək istismara verilmişdir.

Yeri gəlmişkən, rayonun digər kəndlərində istehlakçıların daha da keyfiyyətli elektrik ener­jisi ilə təmin olunması üçün  naqil və kabel xətlərinin yenisi ilə əvəz edilməsi, dayaqların yeni dayaq­larla dəyişdirilməsi, abonentləri elektrik enerjisi ilə qidalandıran transformatorlarda təmir işlərinin görülməsi nəzərdə tutulmuşdur.

“Şəbəkə üzrə elektrik enerjisinin istehlak dəyərinin ödənilməsinə, debitor borcların yığılmasına görə və elektrik enerjisindən istifadə qaydalarının pozulması hallarının qarşısının alınması üçün bütün qüvvələr səfərbər edilib” – deyən mənbə onu da bildirdi ki, cari ilin iyul ayında müəssisənin xidməti ərazisində keçirilmiş reydlər zamanı 168 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 512,9 min  kilovatsaatdan artıq itirilmiş elektrik enerjisinin 30,8 min manata yaxın istehlak dəyəri bərpa edilmişdir.

Onu da qeyd edək ki, cari ilin 7 ayı ərzində 767 qayda pozuntusu aşkar edilərək akt tərtib olunmuş (burada kənar xətt vasitəsilə elektrik enerjisindən istifadə edilməsi halı üstünlük təşkil etmiş və ən çox məişət abonenti (əhali) istehlakçı qrupunda qayda pozuntusu  aşkar edilmişdir), 2 milyon 27,3 min kilovatsaata yaxın itirilmiş elektrik enerjisinin 121,6 min manatdan çox istehlak dəyəri bərpa edilmişdir. Həmin bu məbləğin də 40 faizdən artıq hissəsinin ödənişi təmin edilmiş və qalan hissənin ödənilməsi istiqamətində müvafiq tədbirlər həyata keçirilir.