Bu haqda Qusar Elektrik Şəbəkəsindən “Azərenerji” ASC-nin Mətbuat xidmətinə verilən məlumata görə, hazırda əsas diqqət payız-qış mövsümünə hazırlıqla əlaqədar tədbirlər planın nəzərdə tutulmuş işlərin yerinə yetirilməsinə yönəldilib. Əsas məqsəd, hər il olduğu kimi, bu il də istehlakçıları keyfiyyətli elektrik enerjisi ilə təmin etməkdir. Hazırda rayonun elektrik təsər­rüfatında mühüm təmir-bərpa işləri davam etdirilir. Elek­trik enerjisi ilə təminatda dayanıqlığın təmin olunması məqsədilə yarımstansiyalarda yağ açarları, transformatorlar təmir edilir.

Cari ilin son üç ayı ərzində HEVX-lərində təmir və yenidənqurma, eyni zamanda elektrik xətlərinin müasir standartlara cavab verən SİP kabellə əvəz olunması istiqamətində görülmüş işlər çərçivəsində 12,8 km naqil yenilənmiş, 9 km SİP kabel xətti çəkilmiş, 40-a yaxın dayaq dəyişdirilmiş və 270-dən artıq yeni dayaq basdırılmışdır. Həmçinin cari təmir qrafikinə əsasən həmin bu müddətdə 12 km sallaq naqil dartılmış, 85 dayaq düzləndirilmiş, 60-dan artıq dayaq isə təmir olunmuşdur.

Qeyd edək ki, texniki itkilərin azaldılması istiqamətində isə son üç ay ərzində üç transformator yükə uyğun yenisi ilə əvəzlənmişdir. Eyni zamanda 85-ə yaxın TM və KTM-də isə müxtəlif təyinatlı təmir işləri həyata keçirilmiş və Ənix Tala kəndində bir KTM istismara verilmişdir.

“Elektrik enerjisindən səmərəli istifadə edilməsi, həmçinin itkilərin qarşısının alınması məqsədilə son üç ay ərzində 20-yə yaxın dayaq həyətlərdən kənara çıxarılmış, 350-dən artıq sayğac xüsusi qutularda baxış üçün maneəsiz yerdə quraşdırılmış və 500 metrə yaxın açıq naqil kabellə əvəzlənmişdir” – deyən mənbə onu da qeyd etdi ki, cari ilin iyun ayında müəssisənin xidməti ərazisində keçirilmiş reydlər zamanı 26 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qayda da aktlaşdırılmış və 45.1 min  kilovatsaata yaxın (bunun 20,9 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 2,7 min manatdan çox istehlak dəyəri bərpa edilmişdir.

Onu da qeyd edək ki, cari ilin 6 ayı ərzində 173 qayda pozuntusu aşkar edilərək akt tərtib olunmuş, 226 min kilovatsaata yaxın (bunun 158,8 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 13,6 min manata yaxın istehlak dəyəri bərpa edilmişdir. Həmin bu məbləğin də 10 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbə onu da bildirdi ki, cari ilin iyun ayında müəssisə üzrə 4,2 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 615 min kilovatsaat çoxdur. Hesabat dövründə ümumi ödəniş isə ötən ilin müvafiq dövründəki göstərici ilə müqayisədə mütləq 42 faizə yaxın artmışdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 56 min kilovatsaat artaraq 2 milyon kilovatsaata yaxın olmuşdur. Ötən ilin müvafiq dövrü ilə müqayisədə enerji haqqının ödənişində mütləq artım isə 9 faizə yaxın olmuşdur.

Onu da qeyd etmək yerinə düşərdi ki, cari ilin 6 ayı ərzində müəssisə üşrə ümumi istehlak 30,7 milyon kilovatsaatdan artıq olmuşdur. Nəticədə ötən ilin müvafiq dövrü ilə müqayisədə istehlak 6,2 milyon kilovatsaata yaxın, ödəniş isə mütləq 27 faizdən çox artmışdır. O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 2,8 milyon kilovatsaata yaxın artaraq 15 milyon kilovatsaatdan artıq, ödənişdə mütləq artım isə 13 faizə yaxın olmuşdur.

Sonda onu da qeyd edək ki, görü­lən zəruri tədbirlər istismar sə­viyyəsini yüksəldib, istehlakçıların elektrik enerjisi ilə təminatında müsbət dəyişikliklər yaranıb.