İstehlakçıların dayanıqlı və keyfiyyətli elektrik enerjisi ilə təmin edilməsi məqsədilə yarımstansiyalarda, ötürücü qurğularda əsaslı və cari təmir işlərinin yerinə yetirilməsi, itkilərin azaldılması energetiklərin  ən mühüm vəzifələrindən biridir. Digər enerji obyektlərində olduğu kimi “Mingəçevir Regional Elektrik Şəbəkəsi”ndə (REŞ)  mövsümə hazırlıq məqsədilə müvafiq tədbirlər həyata keçirilir. Şəbəkədən Mingəçevir şəhəri, Bərdə, Yevlax, Ağdaş, Tərtər, Ağdam, Ağsu, Ucar, Göyçay, Naftalan və Goranboy inzibati ərazilərində yerləşən elektrik verilişi xətlərində (EVX) və yarımstansiyalarında  cari ilin  son üç ayı ərzində görülmüş cari və əsaslı təmir işləri barəsində “Azərenerji” ASC-nin Mətbuat xidmətinə daxil olan məlumatda belə deyilir.

Müəssisədən verilən məlumata görə, sözügedən dövr ərzində müəssisənin balans mənsubiyyətinə aid olan 220 kV-lik 4 ədəd, 110 kV-lik 14 ədəd, 35 kV-lik 26 ədəd transformator, müxtəlif gərginlikli 270-ə yaxın isə eleqaz, yağ və vakuum açarları təmir olunmuş, yağlar dəyişdirilərək sınaq yoxlama işləri aparılmış və istismara verilmişdir.

Mənbəyə istinadən qeyd edək ki, balans mənsubiyyətinə aid 35 kV-lik “Karxana”, “I Varvara – Xanabad”, “Xanabad”, Şirvanlı, Xındırıstan və digər EVX-lərdə həyata keçirilmiş müxtəlif təyinatlı təmir işləri həyata keçirilmişdir. O cümlədən, I Goranboy HX-də 3 dayaqarası məftil dəyişdirilmiş, ümumilikdə sözügedən xətlər üzrə isə 70-dən artıq izolyator dəyişdirilmiş və dayanıqlıq daha da möhkəmləndirilmişdir.

Onu da qeyd edək ki, həmin bu dövrdə analoji təmir işləri müəssisənin balans mənsubiyyətinə aid olan 110 kV-lik 1-ci və 2-ci Şəhər, 2-ci  Ucar, 2-ci Yevlax və digər, eyni zamanda 220 kV-lik Ağsu, 1-ci və 2-ci Mingəçevir hava xətlərində də həyata keçirilmişdir. O cümlədən, 1-ci Mingəçevir HX-də 10 dayaqlararası məftillər də təmir olunmuşdur.

Mənbədən əldə etdiyimiz digər bir məlumata görə, təmir işləri sistemtəşkiledici şəbəkəyə aid olan 330 kV-lik 1-ci Abşeron hava xətti (HX) müəssisəsinin xidməti ərasində olan hissəsindən də yan keçməmişdir. Belə ki, həmin bu dövrdə xəttin dayanıqlığının daha da artırılması məqsədilə burada 6 dayaqlararası naqillər təmir olunmuş, 30-a yaxın izolyator dəyişdirilmiş, iki dayaqda 5 ədəd razborka qoyulmuş və digər təmir işləri aparılmışdır. Paralel olaraq analoji işlər eyni gərginlikli, 3-cü, 4-cü və 6-cı Mingəçevir HX-lərində də həyata keçirilmişdir. Bütün bunlarla yanaşı müəssisənin xidməti ərazisində 500 kV-lik 2-ci Abşeron HX-də həyata keçirilən müxtəlif təyinatlı təmir işləri çərçivəsində 3 dayaqda 10 ədəd razborka qoyulmuş və 6 dayaqda kontur torpaqlamalar bərpa olunmuşdur.

Sonda onu da qeyd edək ki, hazırki hava iqlim şəraitini nəzərə alaraq  və yanğın təhlükəsizliyinin təmin edilməsi məqsədilə 220, 110 və 35 kV-lik yarımstansiyaların ərazisi quru otlarından təmizlənmiş və yağ tutumlu avadanlıqların alt hissəsindəki yağ çınqıllar yeni təmiz çınqıllarlarla əvəz edilmişdir. Bütün bunlarla yanaşı digər qabaqlayıcı tədbirlərdə görülmüşdür.