Respublikanın  enerji təsərrüfatında  həyata keçirilən  yenidənqurma işləri  “Xaçmaz” EŞ –dən də yan keçmədi.

Müəssisədən  “Azərenerji” ASC-nin Mətbuat xidmətinə verilən məlumata görə, keyfiyyət göstəricilərinin daha da yaxşılaşdırılması və texniki itkilərin daha da aşağı salınması  məqsədilə müəssisənin balans mənsubiyyətinə daxil olan EVX və TM-lərdə bir sıra təmir işləri aparılıb. O cümlədən, son üç ay ərzində aparılan təmir –bərpa işlərinə 10 kV-lik Nizova EVX-də üç dayaq yeni dəmir dayaqla əvəz olunmuş, 5 dayaq düzləndirilmiş, müəyyən məsafədə naqil yenilənmiş və digər təyinatlı təmir işləri də həyata keçirilmişdir. 0,4 kV-lik xətlərdə isə üç dayaq düzləndirilmiş, 500 metr məsafədə naqil dartılmış və 600 metr məsafədə budama işləri aparılmışdır.

Qeyd edək ki, analoji təmir işlərinin aparıldığı siyahıya 10 kV-lik RTS,  Əhməd-oba, Çarxı və digər  hava elektrik verilişi xətləri daxildir.

Ümumiyyətlə isə sözügedən dövrdə 10 kV-lik xətlərin təxminən 3 kilometrə yaxın məsafəsində əsaslı təmir işləri aparılmış, 14 km-ə yaxın xəttin qabariti normallaşdırılmış, 12 km-dən artıq xəttin trassası yaşıl kütlədən təmizlənmiş, 3 dayaq yenisi ilə əvəzlənmiş və 25-i düzləndirilmiş və digər təyinatlı işlər də aparılaraq enerji xətləri normal iş rejiminə gətirilərək istehlakçıların istifadəsinə verilmişdir. Bütün bunlarla yanaşı TM-lərdə də müxtəlif təyinatlı təmir işləri həyata keçirilmiş və müxtəlif gücdə 6 transformator təmir edilərək istifadəçilərin ixtiyarına verilmişdir.

Sözügedən EŞ-dən əldə edilən məlumata görə, cari ilin iyun ayında müəssisənin xidməti ərazisində 63 istehlakçının sayğac uçot komplektində qüsur aşkar edilərək 610,3 min kilovatsaatdan artıq (bunun 47,9 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 36,6 min manatdan artıq istehlak dəyəri bərpa edilmişdir.

Qeyd edək ki, cari ilin 6 ayı ərzində keçirilmiş reydlər zamanı 500-dən çox istehlakçının qayda pozması faktı aşkar edilərək 2 milyon 222,8 min kilovatsaata yaxın (bunun 933,2 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 133,3 min manatdan artıq istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin müəyyən hissəsinin ödənişi təmin edilmişdir. Qalıq məbləğin ödənilməsi istiqamətində isə müvafiq tədbirlər həyata keçirilir.

Yeri gəlmişkən, cari ilin iyun ayında müəssisə üzrə 10 milyon kilovatsaatdan artıq elektrik enerjisi istehlak edilmişdir. Bu da ötən ilin müvafiq dövrü ilə müqayisədə 1 milyon kilovatsaat azdır. Ödəniş isə ötən ilin müvafiq dövrü ilə müqayisədə 8 faizə yaxın mütləq artmışdır.  O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 1,5 milyon kilovatsaatdan çox azalaraq 5,6 milyon kilovatsaata,  ödənişdə  mütləq artım isə 7 faizə yaxın olmuşdur.

Onu da qeyd etmək yerinə düşərdi ki, cari ilin 6 ayı ərzində müəssisə üzrə istehlak ötən ilin müvafiq dövrü ilə müqayisədə 2,8 milyon kilovatsaata yaxın artaraq 71,4 milyon kilovatsaatdan artıq olmuşdur. Ödəniş isə ötən ilin müvafiq dövrü ilə müqayisədə mütləq 14 faizə yaxın artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 958 min kilovatsaata yaxın artaraq 44,9 milyon kilovatsaata yaxın olmuşdur. Ödənişdə mütləq artım isə 14 faizə yaxın olmuşdur.

Sonda onu da qeyd etmək yerinə düşərdi ki, digər enerji obyektlərində olduğu kimi burada da yanğın təhlükəsizliyi məsələsi daima diqqət mərkəzində saxlanılır. Belə ki, hazırki iqlim şəraitini nəzərə alaraq  və yanğın təhlükəsizliyinin təmin edilməsi məqsədilə TM və KTM-lərin ərazisi quru otlardan təmizlənmiş, yanğınsöndürmə postları yoxlanılmış və komplektləşdirilmişdir. Eyni zamanda yağ tutumlu avadanlıqların alt hissəsindəki yağ çınqıllar yeni təmiz çınqıllarla əvəz edilmişdir.