Digər enerji obyektlərində olduğu kimi “Bakı İstilik Elektrik Mərkəzi”ndə (İEM) də mövsümi tədbirlər vaxtlı-vaxtında icra edilir. Bu da öz növbəsində istehsal prosesinin dayanıqlığını daha da artırır və nəticədə texniki–iqtisadi göstəricilərin daha da yaxşılaşmasına kömək edir.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, cari ilin 7 ayı ərzində dispetçer qrafikinə uyğun olaraq 291,4 milyon kilovatsaata yaxın elektrik enerjisi istehsal edilib. Avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsinin və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində digər texniki iqtisadi göstəricilər üzrə də yüksək göstəricilərə nail olunub. Qeyd edək ki, müəssisədə cari ilin iyul ayında 36,9 milyon kilovatsaata yaxın  elektrik enerjisi istehsal edilmişdir.

“Mövsümə hazırlıq tədbirləri davam etdirilir”, – deyən mənbə cari ilin son üç ayı ərzində həyata keçirilmiş təmir-tikinti işləri barəsində onu bildirdi ki, 1 saylı Buxar Qaz Qurğusunda (BQQ) qrafik üzrə C təftişinə başlanıb. Analoji tədbirlərin bu cür qurğular üzrə hər 24 min saatlıq istismadan bir aparıldığını deyən Bakı İstilik Elektrik Mərkəzindəki (İEM) mənbə bildirdi ki, bu təftiş qurğu quraşdırılandan bəri dördüncü dəfədir ki aparılır. İyulun 8-də start verilən tədbirin təxminən avqust ayının ikinci ongünlüyünün sonuna qədər davam etməsi nəzərdə tutulur. Eyni zamanda stansiyanın iş rejimində istismar edilən müxtəlif təyinatlı nasoslar və digər köməkçi avadanlıqlar təmir edilmişdir. Bundan əlavə pik boylerin də müxtəlif təyinatlı təmir işləri aparılmışdır. Bütün bunlarla yanaşı 2 saylı QTQ-də də müvafiq təmir işləri həyata keçirilmişdir.

Yeri gəlmişkən, sözügedən dövrdə müxtəlif təyinatlı təmir işləri kimya sexində, dəniz su xəttində, hava kompressosrlarında və digər köməkçi sahələrin avadanlıqlarında da həyata keçirilmişdir.

Onu da qeyd edək ki, 110 kV-lik yarımstansiyada  da təmir işləri həyata keçirilmişdir. Belə ki, I “8-ci km” HX-nin əsas mühafizə dövrəsində yeni rele qurğusunun quraşdırılması, 3 saylı transformatorda 110 kV-lik yağ açarının eleqazla əvəzlənməsi,  hidravliki klapanların təmizlənməsi və sairə də görülən işlər sırasındadır. Aparılan işlərin siyahısı ümumilikdə kifayət qədər zəngindir. Bura istehsalat sahəsində görülən təmir və abadlıq işləri ilə paralel olaraq müəssisənin inzibati binasında, həmçinin ayrı-ayrı xidmətlərin normal fəaliyyət göstərmələri üçün yaradılmış  şəraiti də əlavə etmək mümkündür.

Onu da qeyd etmək yerinə düşərdi ki, mövcud iqlim şəraiti ilə bağlı  yanğın təhlükəsizliyi məsələsi daima diqqət mərkəzində saxlanılır. Belə ki, yanğınsöndürmə vasitələrinə, yanğına qarşı su təchizatına növbədənkənar baxış keçirilmiş, ərazi quru otlardan və yanğın törədə biləcək tullantılardan təmizlənmişdir.

Sonda onu da qeyd edək ki, burada payız-qış mövsümünə hazırlıq məqsədilə tədbirlər planında nəzərdə tutulmuş işlər qrafikə uyğun davam etdirilir.

Xatırladaq ki, “Bakı İEM”də hər birinin gücü 53,5 MVt olan iki ədəd qaz turbin qurğusu fəaliyyət göstərir.