“Paylayıcı elektrik şəbəkəsi sisteminin dayanıqlığının daha da möhkəmləndirilməsi istiqamətində ayrı-ayrı şəbəkələrdə, o cümlədən “Göyçay Elektrik Şəbəkəsi”ndə də geniş tərkibli tədbirlər planı hazırlanıb həyata keçirilmiş və bu işlər durmadan davam etdirilir”, -  deyən sözügedən müəssisənin məsul işçisi yenidənqurma və təmir-bərpa işləri barəsində “Azərenerji” ASC-nin Mətbuat xidmətinə məlumat verdi və bildirdi ki, cari ilin son üç ayı ərzində 10 kV-lik II “Şəhər”, I-II “Kənd”, I “Quşçuluq” və digər hava xətlərində həyata keçirilmiş müxtəlif təyinatlı təmir işləri çərçivəsində 4,2 kilometrdən artıq xətt təmir edilmiş, 15 dayaq yenisi ilə əvəzlənmiş və 19 travers quraşdırılmışdır. Sözügedən dövrdə 0,4 kV-lik xətlərdə aparılmış təmir işləri zamanı dayaqlar düzləndirilmiş, məftillərin yerlə qabariti normallaşdırılmış və yaşıl kütlədən təmişlənmişdir. O cümlədən, xətlərin 12,3 kilometrində təmir işləri aparılmış və iki dayaq dəyişdirilmişdir. Qeyd edək ki, sözügedən dövrdə TM-lərin 54-də müxtəlif təyinatlı təmir işləri işləri həyata keçirilmiş, eyni zamanda dörd transformator əsaslı təmir edilərək istehlakçıların xidmətinə verilmişdir.

“Növbəti aylarda da bu işlər davam etdiriləcəkdir. Sayğac uçot komplektinə nəzarətin gücləndirilməsi, istehlakçıların elektrik enerjisindən təyinatı üzrə istifadə etmələri, onlar arasında aparılan maarifləndirmə və təbliğat işinə baxmayaraq hələ də bu və ya digər şəkildə  sayğac sxeminə mudaxilə halları var. Məqsədimiz bu pozuntu faktlarını vaxtında aşkar edərək onların qarşısını almaq, itkiləri minium səviyyəyə endirməkdir”,- deyən mənbə aşkar edilmiş qayda pozuntuları barəsində də məlumat verdi və bildirdi ki, cari ilin iyun ayında 18 istehlakçının (bunun 15-i məişət abonenti (əhali) istehlakçıları qrupuna aiddir) elektrik enrjisindən istifadə qaydalarını pozması faktı aşkar edilərək 58,2 min kilovatsaata yaxın (bunun 35 min kilovatsaatdan çoxu məişət abonenti (əhali) istehlakçıları qrupuna aiddir) itirilmiş elektrik enerjisinin 3,5 min manata yaxın istehlak dəyəri bərpa edilmişdir.  Onu da qeyd edək ki, cari ilin 6 ayı ərzində burada 200-ə yaxın (bunun 176-dan çoxu məişət abonenti (əhali) istehlakçıları qrupuna aiddir) qayda pozuntusu aşkar edilərək 651,3 min kilovatsaata yaxın (bunun 545 min kilovatsaata yaxını məişət abonenti (əhali) istehlakçıları qrupuna aiddir) itirilmiş elektrik enerjisinin 39,1 min manata yaxın istehlak dəyəri bərpa edilmişdir. Həyata keçirilmiş müvafiq tədbirlər nəticəsində həmin bu məbləğlə yanaşı ötən ildən akta görə yaranmış debitor borcun da müəyyən hissəsinin ödənişi təmin edilmişdir. Onu da qeyd etmək yerinə düşərdi ki,  qeydə alınmış qayda pozuntularında dövlət möhürlərinin zədələnməsi, sayğacdan kənar xətt vasitəsilə elektrik enerjisindən istifadə halı üstünlük təşkil etmişdir.

Müəssisə üzrə cari ilin iyun ayında ümumilikdə 6,4 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 230 min kilovatsaata yaxın azdır. Ödəniş isə ötən ilin müvafiq dövrü ilə müqayisədə mütləq bir faizə yaxın artmışdır. O cümlədən, daimi əhali istehlakçı qrupunda isə 3,9 milyon kilovatsaatdan artıq elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 286 min kilovatsaata yaxın azalmış, ödənişdə mütləq artım isə 2 faizə yaxın olmuşdur.  Yeri gəlmişkən, cari ilin 6 ayı ərzində isə ümumi istehlak ötən ilin müvafiq dövrü ilə müqayisədə 1,1 milyon kilovatsaatdan çox artaraq 42,1 milyon kilovatsaata yaxın olmuşdur. Ödənişdə mütləq artım isə 10 faizə yaxın olmuşdur. O cümlədən, daimi əhali istehlakçı qrupunda isə istehlak 26,1 milyon kilovatsaatdan artıq olmuşdur. Nəticədə ötən ilin müvafiq dövrü ilə müqayisədə istehlak 291 min kilovatsaatdan, ödəniş isə mütləq 9 faizdən çox artmışdır.