İstehlakçıların elektrik enerjisinə olan tələbatını tam və keyfiyyətli şəkildə ödəmək məqsədilə paylayıcı elektrik şəbəkəsi  müəssisələrində mühüm addımlar atılır. İstehlak edilən elektrik enerjisinin ümumi ödənişində də irəliləyişə nail olunmuşdur. “Sabirabad Elektrik Şəbəkəsi”ndən (EŞ) “Azərenerji” ASC-nin Mətbuat xidmətinə daxil olan məlumata görə, ötən dövrlərdə olduğu kimi cari ilin son üç ayı ərzində də müəssisənin balans mənsubiyyətinə aid olan 10 kV-lik xətlərin 5,4 kilometrə yaxın hissəsində təmir işləri aparılmış, həmçinin Qalağayın, Xələfli, Narlıq, Şəhriyar və digər bir neçə kənddə 0,4 kV-lik xətlərdə də müxtəlif təyinatlı təmir işləri həyata keçirilmişdir. O cümlədən, həmin bu xətlərin ümumilikdə 7 kilometrdən artıq hissəsi təmir olunmuşdur. Qeyd edək ki, təmir işləri müəssisənin xidmətində olan TM-lərdən də yan ötməmişdir. Belə ki, sözügedən dövrdə bu enerji obyektlərində həyata keçirilmiş müxtəlif təyinatlı təmir işləri zamanı 45-ə yaxın müxtəlif gücdə olan tranformator da təmir olunmuşdir.

Mənbədən əldə edilən digər bir məlumata görə, cari ilin iyun ayında müəssisənin xidməti ərazilərində istehlakçıların elektrik enerjisindən istifadə qaydalarına riayət etməsi ilə bağlı keçirilmiş reydlər zamanı 93 istehlakçının sayğac uçot komplektində qüsur  aşkar edilmişdir. Aşkar edilmiş qayda pozuntuları müvafiq qaydada aktlaşdırılaraq 513,2 min kilovatsaata yaxın itirilmiş elektrik enerjisinin 30,7 min manatdan artıq istehlak dəyəri bərpa edilmişdir. Mənbəyə istinadən onu da qeyd edək ki, cari ilin 6 ayı ərzində isə müəssisənin xidməti ərazisində keçirilmiş reydlər zamanı 1090-a yaxın qayda pozuntusu faktı aşkar edilərək müvafiq qaydada aktlar tərtib edilmişdir. Nəticədə 4 milyon 725,4 min kilovatsaata yaxın itirilmiş elektrik enerjisinin 283,5 min manatdan çox istehlak dəyəri bərpa edilmişdir. Hesabat dövrü ərzində həmin bu məbləğin 93 faizdən artıq hissəsinin ödənişi təmin edilmişdir. Qalıq məbləğin ödənilməsi istiqamətində isə müvafiq tədbirlər həyata keçirilir.

“Qayda pozuntularından elektrik enerjisindən kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir”, – deyən mənbə onu da qeyd etdi ki, enerji təchizatının daha da dayanıqlı təmin edilməsi istiqamətində görülən işlər davam etdirilir. Hazırki iqlim şəraitini nəzərə alaraq, yanğın təhlükəsizliyinin təmin edilməsi məqsədilə də müvafiq tədbirlər həyata keçirilir.

Yeri gəlmişkən, cari ilin iyun ayında müəssisə üzrə 16,4 milyon kilovatsaata yaxın elektrik enerjisi istehlak edilmişdir. Bu da ötən ilin müvafiq dövrü ilə müqayisədə 1,2 milyon kilovatsaata yaxın azdır.  Ödəniş isə ötən ilin müvafiq dövrü ilə müqayisədə mütləq bir faizə yaxın artmışdır. O cümlədən, daimi əhali istehlakçı qrupunda istehlak ötən ilin müvafiq dövrü ilə müqayisədə 925 min kilovatsaata yaxın azalaraq 7,1 milyon kilovatsaatdan çox olmuşdur. Sonda onu da qeyd edək ki, cari ilin 6 ayı ərzində müəssisə üzrə istehlak ötən ilin müvafiq dövrü ilə müqayisədə 3,6 milyon kilovatsaata yaxın artaraq 121,4 milyon kilovatsaatdan artıq olmuşdur. Ödəniş isə ötən ilin müvafiq dövrü ilə müqayisədə mütləq 3 faizdən çox artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 1,8 milyon kilovatsaatdan çox artaraq 75,7 milyon kilovatsaatdan artıq olmuşdur.