“İstehlakçılara göstərilən  xidmətin keyfiyyətinin daha da yüksəldilməsi, texnoloji itkilərin müəyyən olunmuş həddə saxlanması, kommersiya itkilərinin qarşısının alınması, istehlak edilmiş elektrik enerjisinin sərfinə görə ödənişlərin 100 faizə çatdırılması qarşımızda duran ən mühüm vəzifədir. Bununla əlaqədar olaraq ötən illərdə olduğu kimi cari ildə də, o cümlədən son üç ay ərzində müəssisənin xidməti ərazilərində yenidənqurma, təmir-bərpa işləri vaxtlı-vaxtında həyata keçirilir”- deyən “Ağdaş Elektrik Şəbəkəsi”nin məsul işçisi işlərin gedişi barəsində “Azərenerji” ASC –nin Mətbuat xidmətinə məlumat vermişdir.

Onun bildirdiyinə görə, hesabat dövründə müəssisənin balans mənsubiyyətinə aid olan EVX-lərdə yenidənqurma və müxtəlif təyinatlı təmir işləri həyata keçirilmişdir. O cümlədən, Yenikənd kəndində məskunlaşmış məcburi köçkünlərin elektrik enerji təchizatının dayanıqlığının daha da möhkəmləndirilməsi məqsədilə yeni 10 kV-lik xətt çəkilmiş, bir ədəd KTM quraşdırılmışdır. Ümumiyyələ, yenidənqurma və təmir işləri zamanı 10 kV-lik xətlərin 5,1 kilometri təmir edilmiş, 720 metr xətt çəkilmiş, 10 dayaq, 13 travers quraşdırılmışdır. Eyni zamanda 0,4 kV-lik xətlərin isə 20 kilometrə yaxını təmir edilmiş, 1,5 km yeni xətt çəkilmiş və 5 dayaq quraşdırılmışdır.

Qeyd edək ki, təmir işləri müəssisənin balans mənsubiyyətinə aid olan transformator məntəqələrindən də yan ötməmişdir. Belə ki, sözügedən dövrdə 16 TM-də müxtəlif təyinatlı təmir işləri həyata keçirilmiş, eyni zamanda bir transformator əsaslı təmir edilərək təkrara şəbəkəyə qoşulmuşdur.

“Görülmüş və davam etdirilən işlər eyni zamanda kommersiya itkilərinin qarşısının alınması istiqamətində atılmış addımlardan biridir və bu istiqamətdə tədbirlər davam etdirilir” - deyən mənbə onu da bildirdi ki, müəssisənin xidməti ərazisində cari ilin iyun ayında 30-a yaxın  qayda pozuntusu faktı (bunun 22-i məişət abonenti (əhali) istehlakçılar qrupuna aiddir) aşkar edilərək müvafiq aktlar tərtib edilmişdir. Nəticədə 200,7 min kilovatsaata yaxın (bunun 79,7 min kilovatsaata yaxını məişət abonenti (əhali) istehlakçılar qrupuna aiddir) itirilmiş elektrik enerjisinin 12 min manatdan artıq istehlak dəyəri bərpa edilmişdir.

Qeyd edək ki, cari ilin 6 ayı ərzində isə 210-a yaxın istehlakçının (bunun 182-i məişət abonenti (əhali) istehlakçılar qrupuna aiddir) Elektrik Enerjisindən İstifadə Qaydalarını pozması faktı aşkar edilərək 871,3 min kilovatsaatdan çox (bunun 679,5 min kilovatsaata yaxını məişət abonenti (əhali) istehlakçılar qrupuna aiddir) itirilmiş elektrik enerjisinin 52,3 min manata yaxın istehlak dəyəri bərpa edilmişdir. Həyata keçirilmiş müvafiq tədbirlər nəticəsində həmin bu məbləğin 79 faizdən artıq hissəsinin ödənilməsi təmin edilmiş və qalıq hissənin ödənilməsi istiqamətində müvafiq tədbirlər görülür.

Mənbədən əldə edilən digər bir məlumata görə, cari ilin iyun ayında müəssisə üzrə 5,2 milyon kilovatsaata yaxın elektrik enerjisi istehlak edilmişdir. Bu da ötən ilin müvafiq dövrü ilə müqayisədə 568 min kilovatsaat azdır. Ödəniş isə ötən ilin müvafiq dövrü ilə müqayisədə mütləq cüzi artmışdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 449 min kilovatsaat azalaraq 3 milyon kilovatsaatdan çox olmuşdur. Ödənişdə mütləq artım isə 3 faizə yaxın olmuşdur.

Mənbəyə istinadən onu da qeyd edək ki, cari ilin 6 ayı ərzində müəssisə üzrə istehlak ötən ilin müvafiq dövrü ilə müqayisədə 376 min kilovatsaata yaxın azalaraq 36 milyon kilovatsaatdan artıq olmuşdur. Ödəniş isə ötən ilin müvafiq dövrü ilə müqayisədə mütləq 7 faizə yaxın artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 866 min kilovatsaata yaxın azalaraq 21,5 milyon kilovatsaatdan, ödənişdə mütləq artım isə 7 faizdən artıq olmuşdur.