“Hacıqabul Elektrik Şəbəkəsi”ndən “Azərenerji” ASC-nin Mətbuat xidmətinə daxil olan məlumata görə qarşıdakı mövsümə hazırlıq işləri davam etdirilir.

Mənbəyə istinadən qeyd edək ki, rayon mərkəzinin elektrik təchizatı sistemi yeniləşdirilib, 0,4 və 10 kV-lik xətlərdə naqillər təzələnib, bu işlərin məntiqi davamı olaraq istehlakçılar elektrik enerjisinin uçotunun dəqiq aparılmasına imkan yaradan qabaqcadan ödənişli smart-kart tipli sayğaclarla təchiz ediliblər. Hazırda bu tip sayğacların quraşdırılması məqsədilə bir kilometrə yaxın koaksial kabel çəkilmişdir. Bundan başqa müəssisənin xidməti ərazisində 10, 6 və 0,4 kV-lik xətlər yeniləşdirilib və sözügedən xətlərin 9 km-ə yaxını təmir olunub.

Qeyd edək ki, təmir işləri müəssisənin balans mənsubiyyətinə aid olan TM-lərdən də yan ötməmişdir. Belə ki, 9 TM-də müxtəlif təyinatlı təmir işləri həyata keçirilmiş, ümumi gücü 1,6 MVA-ya yaxın olan 8 transformator da təmir edilərək istehlakçıların istifadəsinə verilmişdir.

Mənbə onu da bildirdi ki, cari ilin iyun ayında müəssisənin xidməti ərazilərində istehlakçıların elektrik enerjisindən istifadə qaydalarına riayət etməsi ilə bağlı keçirilmiş reydlər zamanı 38 istehlakçının sayğac uçot komplektində qüsur  aşkar edilmişdir. Aşkar edilmiş qayda pozuntuları müvafiq qaydada aktlaşdırılaraq 273,8 min kilovatsaata yaxın itirilmiş elektrik enerjisinin 16,4 min manatdan artıq istehlak dəyəri bərpa edilmişdir.

Ümumiyyətlə isə cari ilin 6 ayı ərzində isə müəssisənin xidməti ərazisində keçirilmiş reydlər zamanı 290-dan artıq qayda pozuntusu faktı aşkar edilərək müvafiq qaydada aktlar tərtib edilmişdir. Nəticədə 2 milyon 534,1 min kilovatsaata yaxın itirilmiş elektrik enerjisinin 152.1 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində hesabat dövrü ərzində həmin bu məbləğin 35 faizdən artıq hissəsinin ödənişi təmin edilmişdir. Qalıq məbləğin ödənilməsi istiqamətində isə müvafiq tədbirlər həyata keçirilir.

Mənbədən qayda pozuntularının istehlakçı qrupu barədə əldə etdiyimiz məlumata istinadən onu da bildirək ki, ən çox məişət qayda pozuntusu  abonenti (əhali) istehlakçı qrupunda aşkar edilmişdir.

Onu da qeyd edək ki, müəssisə üzrə cari ilin iyun ayında ümumilikdə 10,1 milyon kilovatsaatdan artıq elektrik enerjisi istehlak edilmişdir ki, bu da ötən ilin eyni dövründəki istehlakdan 1,8 milyon kilovatsaat azdır. O cümlədən, daimi əhali istehlakçı qrupunda isə 2,8 milyon kilovatsaata yaxın elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 514 min kilovatsaatdan çox azalmışdır.

Yeri gəlmişkən, cari ilin 6 ayı ərzində isə ümumi istehlak ötən ilin müvafiq dövrü ilə müqayisədə 139 min kilovatsaata yaxın artaraq 61,9 milyon kilovatsaata yaxın olmuşdur. O cümlədən, daimi əhali istehlakçı qrupunda isə istehlak 26,1 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 2,8 milyon kilovatsaata yaxın artmışdır.

Onu da qeyd etmək yerinə düşərdi ki, şəbəkədə diqqətdə saxlanılan əsas məsələlərdən biri də əməyin mühafizəsi və texniki təhlükəsizlik qaydalarına ciddi əməl edilməsidir. Bu məqsədlə şəbəkə işçiləri vaxtaşırı ümumilikdə və fərdi şəkildə təlimatlandırılırlar.