Enerjisistemdə payiz-qiş mövsümünə hazırlıqla əlaqədar tərtib edilmiş tədbirlər planının yerinə yetirilməsi üçün münasib vaxtdir. “Şəmkir Elektrik Şəbəkəsi”nin kollektivi havaların əlverişli keçməsindən yararlanaraq təmir kampaniyasına start verib.

Şəbəkədən “Azərenerji”ASC-nin Mətbuat xidmətinə daxil olan məlumata görə,  son iki ay ərzində müəssisənin balansında olan xətt və avadanlıqların istismar səviyyəsini yüksəlmək üçün  zəruri tədbirlər həyata keçiriblər. Nəticədə  enerji verilişində dayanıqlıq daha da artib, keyfiyyət yaxşılaşıb. Belə ki, elektrik verilişi xətlərinin daha da dayanıqlı fəaliyyəti üçün son ayda 6-10 kV-lik dayaqlardan 37-si, 0,4 kV-lik dayaqlardan isə 69-u yeni dayaqlarla əvəz edilib. Şəbəkə kollektivinin təmirçilər briqadası 6-10 kV-lik EVX-lərdə 8,9 km uzunluğunda naqildə təmir işləri görüb. Bununla yanaşı 0,4 kV-lik EVX-lərdə isə 12 km-lik məsafədə təmir işləri icra olunub. 217 ədəd 6-10 kV-lik  transformator məntəqəsi cari təmir olunub, ərazi alaq otlarından təmizlənib, texniki-təhlükəsizlik tədbirləri gücləndirilib.

Qeyd edək ki, müxtəlif gücə malik transformatorlar da carı təmirdən  çıxarılıb. Onların sayı 36 ədədə çatdırılıb. Enerji mütəxəssisləri bir ədəd 10 kV-lik xəttin budaqlanmasına KRN-10 tipli ayırıcı da quraşdırıblar.

Yeri gəlmişkən, Şəmkir şəhərində və rayonun kəndlərində geniş tikinti-abadlıq işləri görülür, sakinlər yeni-yeni mənzillər inşa edirlər. Şəbəkənin kollektivi isə texniki-istismar qaydalarına uyğun olaraq belə mənzillərə 342 ədəd 1 fazlı sayğac quraşdırıblar.Onu da bildirək ki, rayon mərkəzi, Kür qəsəbəsi, Dəllərcəyir və Daşbulaq kəndləri artiq smart-kart tipli sayğaclarla təmin olunub. Bu da  şəbəkənin işinə müsbət təsir edən amillərdəndir.