“Digər Elektrik Şəbəkələrində (EŞ) olduğu kimi “Salyan” elektrik şəbəkəsində də (EŞ)  istismar səviyyəsinin daha yaxşılaşdırılması istiqamətində əhəmiyyətli addımlar atılır. Gələcəkdə də istehlakçıları daha da keyfiyyətli və dayanıqlı elektrik enerjisi ilə təchiz edilməsi və texniki-iqtisadi göstəricilərin səviyyəsinin yüksəldilməsi üçün nəzərdə tutulan tədbirlər ardıcıllıqla icra olunacaq. Həmişə olduğu kimi, cari ildə də müəssisəmizin xidməti ərazilərində təmir-bərpa işləri vaxtlı-vaxtında həyata keçirilir”, - deyən sözügedən müəssisənin məsul işçisinin  “Azərenerji” ASC-nin Mətbuat xidmətinə verdiyi məlumata görə,  həmin bu dövrdə 10 və 6 kV-lik EVX-lərin 8,7 kilometrində, 0,4 kV-lik xətlərin isə 6 km-də təmir işləri həyata keçirilmişdir. Eyni zamanda 170-ə yaxın TM-də yenidənqurma və müxtəlif təyinatlı təmir işləri aparılmışdır. Bütün bunlarla yanaşı ümumi gücü 1,6 MVA-ya yaxın olan 5 transformator da təmir edilərək təkrar şəbəkəyə qoşulmuşdur.

“Bütün bunlarla yanaşı elektrik enerjisindən istifadə zamanı qaydaların pozulmasının qarşısının alınması istiqamətində də xeyli işlər görülmüş və bu istiqamətdə tədbirlər davam etdirilir”, – deyən mənbə onu da bildirdi ki, cari ilin iyun ayında müəssisənin xidməti ərazisində keçirilmiş reydlər zamanı 46 istehlakçının sayğac uçot komplektində qüsur aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 393,3 min  kilovatsaatdan artıq itirilmiş elektrik enerjisinin 23,6 min manata yaxın istehlak dəyəri bərpa edilmişdir.

Qeyd edək ki, burada cari ilin 6 ayı ərzində keçirilmiş reydlər zamanı 685 istehlakçının elektrik enerjisindən istifadə qaydalarını pozması faktı aşkar edilərək müvafiq qaydada aktlar tərtib edilmişdir. Aktlar üzrə hesabat aparılaraq 5 milyon 941,6 min kilovatsaata yaxın itirilmiş elektrik enerjisinin 356,5 min manata yaxın istehlak dəyəri bərpa edilmişdir. Həyata keçirilmiş müvafiq tədbirlər nəticəsində həmin bu məbləğin 41 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Yeri gəlmişkən,  mənbədən qayda pozuntularının təsnifatı və istehlakçı qrupu barədə əldə etdiyimiz məlumata istinadən onu da bildirək ki, elektrik enerjisindən kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir.

Mənbə onu da bildirdi ki, müəssisə üzrə cari ilin iyun ayında ümumilikdə 23,4 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 1,4 milyon kilovatsaata yaxın çoxdur. Hesabat dövründə ümumi ödəniş isə ötən ilin müvafiq dövründəki göstərici ilə müqayisədə mütləq 6 faizə yaxın artmışdır. O cümlədən, daimi əhali istehlakçı qrupunda isə 5 milyon kilovatsaata yaxın elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 529 min kilovatsaat artmış, ödənişdə mütləq artım isə 11 faizə yaxın olmuşdur.

Onu da qeyd etmək yerinə düşərdi ki, cari ilin 6 ayı ərzində isə ümumi istehlak ötən ilin müvafiq dövrü ilə müqayisədə 10,6 milyon kilovatsaatdan çox artaraq 145,7 milyon kilovatsaata yaxın olmuşdur. Ödənişdə mütləq artım isə 9 faizə yaxın olmuşdur. O cümlədən, daimi əhali istehlakçı qrupunda istehlak 43,6 milyon kilovatsaata yaxın olmuşdur. Nəticədə ötən ilin müvafiq dövrü ilə müqayisədə istehlak 1,9 milyon kilovatsaata yaxın artmış, ödənişdə mütləq artım isə 10,6 faiz olmuşdur.