“Bütün elektroenergetika müəssisələrində olduğu kimi “Sumqayıt” YGEŞ-in əmək kollektivi də istehlakçıları dayanıqlı və keyfiyyətli elektrik enerjisi ilə təmin etmək üçün səylə çalışır. Hər birimiz üzərimizə düşən vəzifənin məsuliyyətini yaxşı tərk edirik. Gündən-günə inkişaf edən iqtisadiyyatımızın elektrik enerjisinə olan tələbatının artdığı bir vaxtda sistem əhəmiyyətli yarımstansiyaların, yüksəkgərginlikli elektrik verilişi xətlərinin daim saz vəziyyətdə olması vacibdir.  Ötən illərdə olduğu kimi cari ilin I yarımilliyində də görülmüş işlərimiz təqdirəlayiqdir”.

Sözügedən müəssisədən “Azərenerji” ASC-nin Mətbuat xidmətinə daxil olan məlumata görə, cari ilin son üç ayı ərzində Azərbaycan və Rusiya enerjisistemlərinin paralel rejimdə işləməsində əhəmiyyətli rola malik olan "Yaşma" yarımstansiyasında texniki yenişləşmə işləri   görülüb. O cümlədən, gücü 240 MVA olan 2 saylı avtotransformator, 330 kV-lik 4 ədəd eleqaz açarı, VIII «Abşeron» və “Xaçmaz” HX-lərin avadanlıqları təmir edilmişdir. Ümumilikdə obyektdə müasir  texnologiyaların tələblərinə cavab verən avadanlıqların  quraşdırılması sistemdə  enerjinin ötürülməsinin dayanıqlığının daha da artmasına müsbət  təsirini göstərib.

Mənbədən daxil olan digər məlumatda bildirilir ki,  sözügedən dövrdə 220 kV-lik “Sənaye Qovşağı”, 110 kV-lik “Sumqayıt-3” yarımstansiyalarında da yenidənqurma və müxtəlif təyinatlı təmir işləri həyata keçirilmişdir. O cümlədən, 220 kV-lik “Sənaye Qovşağı” yarımstansiyasında 110 kV-lik yeni quraşdırılmış “Masazır” HX-nin eyini gərginlikli iki xananası da quraşdırılmışdır.

Qeyd edək ki, sözügedən dövrdə 110 kV-luq 135 saylı yarımstansiyada 1 və 2 saylı 40 MVA transformator, bölmələr arası eleqaz açarı (BAEA), vakuum açarları və onların avadanlıqları təmir edilmiş, yeni quraşdırılmış reaktorlarda şinləmə və kabelləşmə işləri də aparılmışdır. Bütün bunlarla yanaşı, həmin bu dövr ərzində analoji təmir işləri 110 kV-lik “Sumqayıt-2” yarımstansiyasında da həyata keçirilmişdir. Eyni zamanda burada 25 MVA gücündə 3 saylı transformator və onun avadanlıqları da əsaslı təmir olunmuşdur. Yeri gəlmişkən, sözügedən dövrdə 110 kV-lik “Kimyaçılar” yarımstansiyasında da təmir işləri reallaşdırılmışdır.

Hava xətləri üzrə görülən işlərə gəldikdə isə mənbə onu da bildirdi ki, balans mənsubiyyətinə daxil olan EVX-yə vaxtında texniki baxış keçirilir, mövcud olan hər hansı nasazlıqlar yerindəcə aradan qaldırılır. 330 kV-lik I, VIII “Abşeron”, 220 kV-lik “Yaşma”, VII “Abşeron”, 110 kV-lik I-V “Sumqayıt” və digər hava elektrik verilişi xətləri bu qəbildən olan enerji obyektləridir.  Belə ki, adıçəkilən EVX-lərin dayanıqlığının daha da artırılması məqsədilə burada müxtəlif təyinatlı yenidənqurma və təmir-bərpa işləri yerinə yetirilmişdir.

Yeri gəlmişkən, iqlim şəraiti ilə bağlı Planlaşdırılmış Tədbirlərə uyğun olaraq müəssisədə təmir işləri ilə yanaşı yanğına qarşı tədbirlər də vaxtında və keyfiyyətlə yerinə yetirilib. Belə ki, bütün yağ tutumlu elektrik avadanlıqlarında yağın səviyyəsi yoxlanılmış, ərazi quru otlardan təmizlənmişdir.

Onu da qeyd etmək yerinə düşərdi ki, şəbəkədə istismarda olan ildırımdan mühafizə vasitələrinə baxış keçirilmiş, aşkar edilmiş qüsurlar aradan qaldırılmış və tam yararlı vəziyyətə gətirilmişdir.