“Enerjisistemin bütün müəssisələri kimi bizim müəssisənin də balans mənsubiyyətinə aid olan yarımstansiyalarda, transformator məntəqələrində mütəmadi olaraq yenidənqurma və təmir işləri davam etdirilir. Yanğın təhlükəsizliyi tədbirləri də günün tələbləri səviyyəsində yerinə yetirilir”, - deyən “Cəlilabad Elektrik Şəbəkəsi”nin (EŞ) məsul işçi təmir işləri və aparılmış müvafiq tədbirlər nəticəsində istehlakçıların sayğac uçot komplektində aşkar edilmiş qayda pozuntuları barəsində “Azərenerji” ASC-nin Mətbuat xidmətinə məlumat vermişdir.

Mənbənin bildirdiyinə görə, cari ildə müəssisənin xidməti ərazisində həyata keçirilən yenidənqurma işləri çərçivəsində smartkart tipli sayğacların quraşdırılması məqsədilə 13,3 kilometrə yaxın koaksal kabel çəkilmişdir. Eyni zamanda 10, 6 və 0,4 kV-lik EVX-lərin ümumilikdə 4.3 kilometrə yaxın hissəsi yenidən qurulmuşdur.

Qeyd edək ki, sözügedən dövrdə müəssisənin balans mənsubiyyətinə aid olan 17 transformator məntəqəsində müxtəlif təyinatlı təmir işləri həyata keçirilmişdir. Eyni zamanda ümumi gücü 1,3 MVA-ya yaxın olan üç transformator da təmir edilərək tam işlək vəziyyətə gətirilmişdir.

Mənbədən daxil olan məlumatda o da bildirilir ki, cari ilin iyun ayında müəssisənin xidməti ərazisində keçirilmiş reydlər zamanı 54 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 158,9 min  kilovatsaata yaxın itirilmiş elektrik enerjisinin 9,5 min manatdan çox istehlak dəyəri bərpa edilmişdir.

Onu da qeyd edək ki, cari ilin 6 ayı ərzində isə 365 qayda pozuntusu aşkar edilərək akt tərtib olunmuş, 1 milyon 763,9 min kilovatsaatdan artıq itirilmiş elektrik enerjisinin 105,8 min manatdan çox istehlak dəyəri bərpa edilmişdir. Həmin bu məbləğin 55 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir. Onu da qeyd etmək yerinə düşərdi ki, burada elektrik enerjisindən kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir.

Mənbə onu da bildirdi ki, cari ilin iyun ayında müəssisə üzrə 8,3 milyon kilovatsaatdan artıq elektrik enerjisi istehlak edilmişdir ki, bu da ötən ilin müvafiq dövrü ilə müqayisədə 28 min kilovatsaat çoxdur. Hesabat dövründə ümumi ödəniş isə ötən ilin müvafiq dövründəki göstərici ilə müqayisədə mütləq 17 faizdən çox artmışdır. O cümlədən, daimi əhali istehlakçı qrupunda isə istehlak ötən ilin müvafiq dövrü ilə müqayisədə 26 min kilovatsaata yaxın azalaraq 6,6 milyon kilovatsaata yaxın olmuşdur. Ötən ilin müvafiq dövrü ilə müqayisədə enerji haqqının ödənişində mütləq artım isə 20 faizdən artıq olmuşdur. Cari ilin 6 ayı ərzində müəssisə üşrə ümumi istehlak 56,5 milyon kilovatsaatdan artıq olmuşdur. Nəticədə ötən ilin müvafiq dövrü ilə müqayisədə istehlak 231 min kilovatsaatdan, ödəniş isə mütləq 14 faizdən çox artmışdır. O cümlədən, daimi əhali istehlakçı qrupunda isə istehlak ötən ilin eyni dövrü ilə müqayisədə 300 min kilovatsaata yaxın azalaraq 44,5 milyon kilovatsaata, ödənişdə mütləq artım isə 17 faizə yaxın olmuşdur.

Yeri gəlmişkən, enerji təchizatının daha da dayanıqlı təmin edilməsi istiqamətində görülən işlər davam etdirilir.