Elektrik enerjisindən istifadə zamanı qaydaların pozulmasının qarşısının alınması istiqamətində  xeyli işlər görülmüş və bu istiqamətdə tədbirlər davam etdirilir.

“Azərenerji” ASC-nin Mətbuat xidmətinə “Oğuz Elektrik Şəbəkəsi”ndən (EŞ) daxil olan məlumata görə, cari ilin iyun ayında müəssisənin xidməti ərazisində keçirilmiş reydlər zamanı 19 istehlakçının sayğac uçot komplektində pozuntu faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 40,6 min  kilovatsaatdan artıq itirilmiş elektrik enerjisinin 2,4 min manatdan çox istehlak dəyəri bərpa edilmişdir.

Qeyd edək ki,  cari ilin 6 ayı ərzində isə müəssisə üzrə 97 qayda pozuntusu faktı aşkar edilərək 309,4 min kilovatsaatdan artıq itirilmiş elektrik enerjisinin 18,6 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində hesabat dövrü ərzində həmin bu məbləğin 91 faizdən artıq hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.

Mənbədən əldə edilən digər bir məlumata görə, cari ilin son üç ayında burada istehlakçıların elektrik enerjisi təminatının keyfiyyətinin və dayanıqlığının daha da yaxşılaşdırılması məqsədilə yenidənqurma, təmir-tikinti işləri həyata keçirilmişdir. Belə ki, sözügedən dövrdə 10 kV-lik “ATS”, “Xaçmaz”, “Sincan” və digər hava xətlərində (HX) həyata keçirilmiş müxtəlif təyinatlı təmir işləri zamanı xətlərin bir kilometrə yaxını təmir edilmişdir. Eyni zamanda 0,4 kV-lik xətlərin isə 1,1 kilometrə yaxın hissəsində müvafiq işləri aparılmışdır. Onu da qeyd edək ki, sözügedən dövrdə müəssisənin xidməti ərazisində olan transformator məntəqələrinin  (TM) 13-də müxtəlif təyinatlı təmir işləri həyata keçirilmişdir. Bununla yanaşı, təsdiq edilmiş plan-qrafikdə nəzərdə tutulmuş tədbirlərin müvəffəqiyyətlə yerinə yetirilməsi və istismar zamanı meydana çıxmış nasazlıqların aradan qaldırılması istiqamətində hazırda tədbirlər davam etdirilir.

Yeri gəlmişkən, mövcud iqlim şəraiti ilə bağlı  yanğın təhlükəsizliyi məsələsi daima diqqət mərkəzində saxlanılır. Yağ tutumlu avadanlıqların alt hissəsindəki yağ çınqıllar yeni təmiz çınqıllarla əvəz edilmiş, ərazi quru otlardan və yanğın törədə biləcək tullantılardan təmizlənmişdir.

Mənbə onu da bildirdi ki, müəssisə üzrə cari ilin iyun ayında ümumilikdə 5,7 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 614 min kilovatsaat çoxdur. Hesabat dövründə ümumi ödəniş isə ötən ilin müvafiq dövründəki göstərici ilə müqayisədə mütləq bir faizə yaxın artmışdır. O cümlədən, daimi əhali istehlakçı qrupunda isə 860 min kilovatsaata yaxın elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 36 min kilovatsaat artmış, ödənişdə mütləq artım isə 30 faizə yaxın olmuşdur.

Onu da qeyd etmək yerinə düşərdi ki, cari ilin 6 ayı ərzində ümumi istehlak ötən ilin müvafiq dövrü ilə müqayisədə 3,4 milyon kilovatsaat artaraq 34 milyon kilovatsaata yaxın  olmuşdur. Ödənişdə mütləq artım isə 6 faizdən artıq olmuşdur. O cümlədən, daimi əhali istehlakçı qrupunda isə istehlak 5,8 milyon kilovatsaatdan artıq olmuşdur. Nətəcədə ötən ilin müvafiq dövrü ilə müqayisədə istehlak 352 min kilovatsaatdan çox artmış, ödənişdə mütləq artım isə 15 faizdən artıq olmuşdur.

Sonda onu da bildirək ki, növbəti mövsümün uğurla başa çatdırılması istiqamətində enerji təchizatçıları öhdələrinə düşən vəzifələri layiqincə yerinə yetirməyə çalışırlar.