“Siyəzən Elektrik Şəbəkəsi”nin kollektivi qarşıya qoyulan vəzifələrin vax­tında və uğurla yerinə yetirilməsi üçün səylə çalışır. Şəbəkədən görülən işlərlə bağlı “Azərenerji” ASC-nin Mətbuat xidmətinə verilən məlumatda bildirildi ki, 330 kV-lik “Yaşma” yarımstansiyasından çıxan xətlərlə qidalanan, təxminən keçən əsrin ortalarından fəaliyyətdə olan 110/35/6 kilovoltluq “Siyəzən” yarımstansiyasında istismar səviyyəsinin yüksəldilməsi üçün mühüm tədbirlər icra olunub.

110 kV-lik yağ açarlarının müasir tipli eleqaz açarları ilə əvəz olunması,  ayırıcıların dəyişdirilməsi, əməliyyatlar aparılan zaman müəyyən problemlərin yaranmasına səbəb olan avadanlıqların da yeniləri ilə əvəz olunması dayanıqlığın  daha da yüksəldilməsinə səbəb olub.

Mənbəyə istinadən qeyd edək ki, təxminən 150-dən çox abonenti olan Məşrif kəndini qidalandıran 6 kilovoltluq xətdə yenidənqurma işləri aparılıb. Dayaqlar yeniləri ilə dəyişdirilib. Kənddaxili 0,4 kilovoltluq şəbəkədə də təmir işləri aparılaraq qəza hallarının qarşısının alınması və enerji itkilərinin aradan qaldırılması üçün tədbirlər görülüb. İzolyatorların dəyişdirilməsi, xətlərin düzləndirilməsi, transformator məntəqələrinə yağların əlavə olunması və dəyişdirilməsi deyilənlərə nümunə göstərilə bilər.

Zarat kəndində də enerji itkilərinin qarşısını almaq üçün müəyyən tədbirlər icra olunmaqdadır. Burada həm izolyatorlar, həm dayaqlar, həm də xətlər daha yüksək texniki tələblər səviyyəsinə gətirilir, eyni zamanda, transformator məntəqələri təmir edilir. Bundan başqa, 35/10 kilovoltluq “Zarat” yarımstansiyasından çıxan xətlərin yağ açarları təmir edilib, rele-mühafizə dövrələri yoxlanılıb və yağ açarlarına yağ əlavə olunub.

Yeri gəlmişkən, Yenikənd, Kolanı və Buduq kəndlərini qidalandıran və uzunluğu 25 km olan “Çınqılzavod” hava xəttinin yeniləşdirilməsi istiqamətində də zəruri tədbirlər reallaşdırılmaqdadır. Qeyd olunan ərazi üzrə istismarda olan və hazırda «Dəmir yolu» hava xəttindən qidalanan 2 transformatorun da şəbəkənin balansına keçirilməsi nəzərdə tutulur.

Mənbə onu da bildirdi ki, yaxın perspektivdə “Siyəzən” yarımstansiyasından çıxaraq şəhərin təxminən üçdə bir hissəsini elektrik enerjisi ilə qidalandıran 6 kV-lik 15 saylı xəttin 0,4 kV-lik hissəsinin SİP kabellə təmin olunması məqsədilə layihələşdirmə işləri reallaşdırılıb. Bu da təxminən 5 km-ə qədər hissəni əhatə edəcək və öz səmərəsini verəcək. Yeni salınmış yaşayış məntəqələrində də şəbəkələrin qurulması və 650-yə yaxın sayğacın quraşdırılması planlaşdırılır.