Qax rayonu energetikləri və enerji təchizatçıları öhdələrinə düşən vəzifənin öhdəsindən layiqincə gəlməyə çalışırlar. Enerjinin istehlakçılara çatdırılması və kommersiya itkilərinin qarşısının alınması istiqamətində ötən dövrlərdə olduğu kimi, son üç ayda da uğurlu addımlar atılmışdır. İstismar səviyyəsinin yüksəldilməsi  enerji haqlarının ödənişində müsbət dəyişiklik yaranmışdır.

„Qax Elektrik Şəbəkəsi”ndən “Azərenerji” ASC-nin Mətbuat xidmətinə daxilı olan məlumatda  bildirilir ki, bu istiqamətdə atılan addımlar sırasına 35 kV-lik "Qax" yarımstansiyasından çıxan 10 kV-lik “Güllük”, III “Şəhər”, “İlisu”, “Sənaye”, “Qıpçaq” hava xətlərində həyata keçirilmiş müxtəlif təyinatlı  təmir işləri də daxildir.  Sözügedən dövrdə bu xətlərin 10,5 kilometrdən artıq hissəsi təmir edilmişdir.

Mənbədən daxil olan məlumata görə, təmir işləri müəssisənin balans mənsubiyyətinə aid olan 0,4 kV-lik EVX-lərdən və transformator məntəqələrindən (TM) də yan ötməmişdir. Belə ki, həmin bu dövrdə 6 kilometrdən artıq xətt və səkkiz TM-də təmir işləri həyata keçirilmişdir.

Mənbədən o da bildirilir ki, iqlim şəraitinin istiləşməsi isə energetiklərin həyata keçirəcəkləri işin həcmini artırıb. Belə ki, müxtəlif gərginlikdə olan xətlərin trassası yaşıl kütlədən, ərazi isə quru otlardan və yanğın törədə biləcək tullantılardan təmizlənmişdir.

"Biz paralel olaraq payız-qış mövsümü üçün hazırlıq işlərini plan-qrafikə uyğun aparırıq. Eyni zamnda elektrik enerjisindən qeyri-qanuni istifadə hallarının qarşısının alınması məqsədilə də mütəmadi reydlər keçiririk“, - deyən mənbə cari ildə bi istiqamətdə görülmüş işlərdən də danışdı.

Mənbəyə istinadən qeyd edək ki, cari ilin iyun ayı ərzində 13 qayda pozuntusu faktı aşkar edilərək müvafiq aktlar tərtib edilmişdir. Nəticədə 42,3 min kilovatsaatdan artıq itirilmiş elektrik enerjisinin 2,5 min manatdan çox istehlak dəyəri bərpa edilmişdir.

Qeyd edək ki, cari ilin 6 ayı ərzində isə 90-dan artıq istehlakçının elektrik enerjisindən istifadə qaydalarını pozması faktı aşkar edilərək 168,4 min kilovatsaatdan artıq itirilmiş elektrik enerjisinin 10.1 min manatdan çox istehlak dəyəri bərpa edilmişdir. Hesabat dövründə həyata keçirilmiş müvafiq tədbirlər nəticəsində həmin bu məbləğlə yanaşı ötən ildən aktlara görə yaranmış debitor borcun da müəyyən hissəsinin ödənişi təmin edilmiş və qalıq hissənin ödənilməsi istiqamətində müvafiq tədbirlər görülür.

Qayda pozuntularının təsnifatı və istehlakçı qrupu barədə əldə etdiyimiz məlumata istinadən onu da bildirək ki, elektrik enerjisindən kənar xətt vasitəsilə qeyri qanuni istifadə halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir

Mənbə onu da qeyd etdi ki, cari ilin iyun ayında müəssisənin xidmət ərazisində 2,7 milyon kilovatsaata yaxın elektrik enerjisi istehlak edilmişdir ki, bu da ötən ilin müvafiq dövründəki istehlakdan 125 min kilovatsaat çoxdur. Ödəniş isə ötən ilin müvafiq dövründəki göstəricidən mütləq 18,5 faiz çox olmuşdur. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 121 min kilovatsaata yaxın azalaraq 1,5 milyon kilovatsaatdan artıq olmuşdur. Ödənişdə mütləq artım isə 11 faizdən artıq olmuşdur.

Əldə etdiyimiz digər bir məlumat görə, cari ilin 6 ayı ərzində isə burada 17,5 milyon  kilovatsaata yaxın elektrik enerjisi istehlak edilib. Nəticədə ötən ilin müvafiq dövrü ilə müqayisədə istehlak 1,5 milyon kilovatsaatdan, ödəniş isə mütləq 16 faizdən çox artmışdır. O cümlədən, daimi əhali istehlakçı qrupu üzrə istehlak ötən ilin müvafiq dövrü ilə müqayisədə 537 min kilovatsaata yaxın artaraq 10,7 milyon kilovatsaatdan artıq olmuşdur. Ödənişdə mütləq artım isə 9 faizdən çox olmuşdur.

Mənbədən daxil olan son məlumata görə, fövqəladə hallar nəzərə alınmazsa, müəssisələrin avadanlıqları texniki göstəriciləri  baxımından  iqlim şəraitinə tam hazırdır.