Digər enerji obyektlərində olduğu kimi “Şəki” regional elektrik şəbəkəsinin (REŞ) də xidməti ərazilərində elektrik enerjisi təchizatında yaranacaq hər hansı bir problemin qarşısının vaxtında alınması məqsədilə  ənənəvi olaraq təmir işləri yerinə yetirilmişdir. Bu enerji müəssisələri sırasına  REŞ-in balans mənsubiyyətində fəaliyyət göstərən “Şəki” Elektrik Şəbəkəsini  (EŞ) də daxil etmək olar.

“Azərenerji” ASC-nin Mətbuat xidməti bu barədə bildirir ki, rayonun enerji təchizatının daim stabil və keyfiyyətli təminatı məqsədilə  “Şəki” EŞ-də son üç ay ərzində  müxtəlif təyinatlı təmir-bərpa işləri həyata keçirilib. Müəssisədən bildirildiyinə görə, EŞ-in 10 kV-lik “Aydınbulaq”, “B.Küngüt”, “B.Zəyzid”, “B. Göynük”, “Baltalı”, “Öyrət”, “Kiş” hava elektrik verilişi  xətlərində  təxminən 21 km-dən artıq məsafədə təmir-bərpa işləri aparılmışdır. Analoji işlər 0,4kV-lik EVX-lər üzrə də aparılıb. Belə ki, Şəki şəhəri də daxil olmaqla, Cəfərabad, Qayabaşı, Qoxmuq, B. Zəyzid, K. Zəyzid və digər bir neçə kəndlərin ərazisində 5,4 kilometrdən artıq məsafədə elektrik verilişi xətləri təmir edilmişdir. 10/0,4 kV-lik transformator məntəqələrinin (TM) təmirinə gəlincə isə, burada 20 TM-də əsaslı və cari təmir işləri aparılıb və avadanlıqlar normal iş rejmində istifadəyə verilmişdir. Həyata keçirilən təmir işləlrini nəzərə alaraq demək olar ki, rayonun enerji təminatında fövqəladə vəziyyətləri istisna etməklə heç bir problem yaranmayacaq.  Hazırki texniki göstəricilər bunu deməyə imkan verir.

Qeyd edək ki, elektrik enerjisindən qeyri-qanuni istifadə hallarının qarşısının alınması istıqamətində də reydlər davam etdirilir. Belə ki, cari ilin iyun ayında müəssisənin xidməti ərazisində keçirilmiş reydlər zamanı 57 istehlakçının  “Elektrik Enerjisindən İstifadə Qaydaları”nı pozması faktı aşkar edilmişdir. Aşkar edilmiş qayda pozuntuları müvafiq qaydada aktlaşdırılmış və 209,6 min  kilovatsaata yaxın itirilmiş elektrik enerjisinin 12,5 min manatdan artıq istehlak dəyəri bərpa edilmişdir.

Onu da qeyd edək ki, cari ilin 6 ayı ərzində isə 430-dan artıq qayda pozuntusu faktı  aşkar edilərək 1 milyon 385,1 min kilovatsaata yaxın itirilmiş elektrik enerjisinin 83,1 min manatdan artıq istehlak dəyəri bərpa edilmişdi. Həyata keçirilən müvafiq tədbirlər nəticəsində həmin bu məbləğin 63 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər həyata keçirilir.  Qayda pozuntularının təsnifatına və istehlakçı qrupuna gəldikdə isə, elektrik enerjisindən kənar xətt vasitəsilə istifadə edilməsi halı üstünlük təşkil etmiş və ən çox qayda pozuntusu  məişət abonenti (əhali) istehlakçı qrupunda aşkar edilmişdir.

Mənbə onu da bildirdi ki, müəssisə üzrə cari ilin iyun ayında ümumilikdə 9,7 milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 436 min kilovatsaat çoxdur. Hesabat dövründə ümumi ödəniş isə ötən ilin müvafiq dövründəki göstərici ilə müqayisədə mütləq 7 faizə yaxın artmışdır. O cümlədən, daimi əhali istehlakçı qrupunda isə 4,6 milyon kilovatsaata yaxın elektrik enerjisi istehlak edilmişdir. Ötən ilin müvafiq dövrü ilə müqayisədə istehlak 369 min kilovatsaat artmış, ödənişdə mütləq artım 2 faizdən artıq olmuşdur.

Yeri gəlmişkən, cari ilin 6 ayı ərzində isə ümumi istehlak ötən ilin müvafiq dövrü ilə müqayisədə 3,7 milyon kilovatsaata yaxın artaraq 65,8 milyon kilovatsaatdan artıq olmuşdur. Ödənişdə mütləq artım isə 10 faizdən çox olmuşdur. O cümlədən, daimi əhali istehlakçı qrupunda isə istehlak 34,9 milyon kilovatsaatdan artıq olmuşdur. Nəticədə ötən ilin müvafiq dövrü ilə müqayisədə istehlak 3 milyon kilovatsaatdan çox artmış, ödənişdə isə mütləq artım 7 faizdən artıq olmuşdur.