Reydlər zamanı sayğacların dövlət möhürlərinin zədələnməsi, müdaxilə edilən sayğacların istehlak edilmiş elektrik enerjinin bir hissəsinin qeydə almaması, sayğacdan kənar xətdən istifadə və digər qüsurlar aşkar olunur. Həmin istehlakçılara qarşı daha sərt tədbirlər görülür.  “Azərenerji” ASC-nin Mətbuat xidmətinə “Ağstafa Elektrik Şəbəkəsi”ndən (EŞ) daxil olan məlumata görə,  cari ilin iyun ayında müəssisənin xidməti ərazisində həyata keçirilmiş reydlər zamanı 13 istehlakçının elektrik enerjisindən istifadə qaydalarını pozması faktı aşkar edilmişdir. Aşkar edilmiş qayda pozuntularına əsasən tərtib edilmiş aktlar üzrə müvafiq qaydada hesabatlar aparılaraq 50,2 min  kilovatsaata yaxın itirilmiş elektrik enerjisinin 3 min manatdan artıq istehlak dəyəri bərpa edilmişdir.

Qeyd edək ki, cari ilin 6 ayı ərzində isə 92 qayda pozuntusu aktı tərtib olunmuş, 342,5 min kilovatsaatdan artıq itirilmiş elektrik enerjisinin 20,6 min manata yaxın istehlak dəyəri bərpa edilmişdir. Həyata keçirilən müvafiq tədbirlər nəticəsində həmin bu məbləğin 85 faizə yaxın hissəsinin ödənişi təmin edilmiş və qalan hissənin ödənilməsi istiqamətində isə müvafiq tədbirlər görülür. Yeri gəlmişkən, qayda pozuntularına görə cari ilin iyun ayında tədbir görülməsi üçün 5 istehlakçı barəsində toplanmış sənədlər hüquq mühafizə orqanlarına göndərilmişdir.

“İstehlakçıların elektrik enerjisinə olan tələbatını daha da keyfiyyətli şəkildə ödənməsi, eyni zamanda qayda pozuntularının qarşısının alınması məqsədilə paylayıcı şəbəkələrdə mühüm addımlar atılır ki, bunun nəticəsində də dayanıqlıq daha da möhkəmlənir, ifrat yüklənmələr aradan qaldırılır, itkilər azaldılır, istehlak edilən elektrik enerjisinin ödənişində isə yüksək göstəricilərə nail olunur”, – deyən mənbə cari ilin son üç ayında həyata keçirilmiş təmir işləri barəsində də məlumat vedi.

Mənbəyə istinadən qeyd edək ki, müəssisənin balans mənsubiyyətinə aid olan 10, 6 və 0,4 kV-lik EVX-lərdə həyata keçirilən müxtəlif təyinatlı təmir işləri zamanı ümumilikdə 14,6 kilometrdən artıq naqil təmir edilmişdir. Eyni zamanda 70-dən artıq yeni dayaq quraşdırılmışdır.

Onu da qeyd etmək yerinə düşərdi ki, sözügedən dövrdə müəssisənin xidməti ərazisində olan transformator məntəqələrinin 22-də müxtəlif təyinatlı təmir işləri həyata keçirilmiş və iki transformator da təmir edilərək istehlakçıların istifadəsinə verilmişdir.

Mənbədən əldə edilən digər bir məlumata görə, cari ilin iyun ayında müəssisənin xidməti ərazisində 6,7  milyon kilovatsaata yaxın elektrik enerjisi istehlak edilmişdir ki, bu da ötən ilin eyni dövründəki istehlakdan 150 min kilovatsaat azdır. Ödəniş isə ötən ilin eyni dövrü ilə müqayisədə nəzərəçarpacaq dərəcədə mütləq artmışdır. O cümlədən, daimi əhali istehlakçı qrupu tərəfindən istehlak 2,4 milyon kilovatsaatdan artıq olmuşdur. Nəticədə ötən ilin eyni dövrü ilə müqayisədə istehlak 89 min kilovatsaatdan, ödənişdə mütləq artım isə 4 faizdən çox olmuşdur.

Onu da qeyd  edək ki, cari ilin 6 ayı ərzində müəssisə üzrə istehlak ötən ilin eyni dövründəki istehlakla müqayisədə 400 min kilovatsaata yaxın azalaraq 42,4 milyon kilovatsaata yaxın olmuşdur. Ödənişdə mütləq artım isə 9 faiz olmuşdur.  O cümlədən, daimi əhali istehlakçı qrupu üzrə bu göstəricilər müvafiq olaraq 663 min kilovatsaata, 16,5 milyon kilovatsaata yaxın və 3 faizdən artıq olmuşdur.