Ümummilli Liderimiz Heydər Əliyevin adı ilə qırılmaz tellərlə bağlı olan, respublikada istehsal edilən elektrik enerjisinin 40 faizə yaxın hissəsini hasil edən  “Azərbaycan İstilik Elektrik Stansiyası”nda (İES) həmişə olduğu kimi cari ilin I yarımilliyində də enerji blokları və avadanlıqlarında dayanıqlı, qənaətli iş rejimi təmin olunmuş, elektrik enerjisi istehsalı dispetçer qrafikinə uyğun davam etdirilmişdir.

Stansiyadan “Azərenerji” ASC-nin Mətbuat xidmətinə daxil olan məlumata görə,  cari ilin iyun ayında 437,1 milyon kilovatsaata yaxın elektrik enerjisi istehsal edilmişdir. Cari ilin 6 ayında da əzmkarlıqla çalışdıqlarını vurğulayan mənbə bildirdi ki, sözügedən dövr ərzində stansiyada 1 milyard 600,8 milyon kilovatsaata yaxın  elektrik enerjisi istehsal edilmişdir.

Qeyd edək ki, avadanlıqların iş səmərəliliyinin artırılması, enerjinin ötürülməsi və paylaşdırılması sistemlərinin dayanıqlı, sabit işləməsi və istismar səviyyəsinin  yüksəldilməsi istiqamətində həyata keçirilmiş məqsədyönlü tədbirlər nəticəsində elektrik enerji istehsalının digər texniki göstəricilərində də yüksək nəticələr əldə edilmişdir.

Cari ildə nəzərdə tutulmuş təmir-bərpa işləri barədə məlumat verən  mənbə onu da qeyd etdi ki, hazırda 3 saylı enerji blokunda əsaslı təmir, 2 saylı tuneldə suötürücü kanalın yamacında betonlama, 330 kV-lik yarımstansiyada hava açarının eleqazla əvəzlənməsi və digər işlər davam etdirilir.

Mənbədən onu da bildirdilər ki, respublika enerji sisteminin bütün sahələrində olduğu kimi, “Azərbaycan” İES-in də normal fəaliyyətini davam etdirməsi üçün  tərtib edilmiş təmir qrafikinə uyğun olaraq son üç ay ərzində bir blokda əsaslı təmir işləri başa çatdırılmışdır. 330 və 500 kV-lik yarımstansiyalarda hava açarlarının eleqaz açarlarla dəyişdirilməsi, eyni zamanda digər köməkçi istehsalat sahələrində avadanlıq, bina və qurğularda təmir-profilaktika işlərinin aparılması üzrə nəzərdə tutulmuş işlərə isə start verilmişdir.

Sonda onu da qeyd edək ki, burada yay mövsümünə hazırlıqla əlaqədar olaraq yanğına qarşı təhlükəsizlik tədbirləri gücləndirilmişdir. Bununla əlaqədar olaraq stansiyadaxili yanğınsöndürmə su xətləri və nasosxana, həmçinin avtomatik yanğınsöndürmə sistemləri saz vəziyyətə gətirilmiş, ilkin yanğınsöndürmə vasitələrinə baxış keçirilmiş, aşkar edilmiş nasazlıqlar aradan qaldırılmışdır. Ümumiyyətlə, müntəzəm olaraq yanğın təhlükəli obyektlərə baxış keçirilir və aşkar edilən ən xırda nasazlıqlar aradan qaldırılır.